სასამართლომ დადასტურებულად მიიჩნია, რომ ვალერი გელაშვილზე განხორციელებულ სასტიკ ანგარიშსწორებას ორგანიზებას ყოფილი პრეზიდებტი, მიხეილ სააკაშვილი უწევდა, - განაცხადა ვალერი გელაშვილის ცემის საქმის პროკურორმა, არჩილ ტყეშელაშვილმა.
როგორც ის განმარტავს, იმ უტყუარი მტკიცებულებების საფუძველზე, რომელიც ბრალდების მხარეს სასამართლოში წარდგენილი ჰქონდა, გამამტყუნებელი განაჩენის მოლოდინი ჰქონდა.
"დღეს მიხეილ სააკაშვილის მიმართ გამამტყუნებელი განაჩენი გამოვიდა. ჩვენი მოლოდინიც ზუსტად ასეთი იყო, ვინაიდან ბრალდების მხარემ სასამართლოში წარვადგინეთ უტყუარი და დამაჯერებელი მტკიცებულებების ერთობლიობა, რომელიც გონივრულ ეჭვს მიღმა ადასტურებდა მიხეილ სააკაშვილის ბრალეუულობას. ამდენად, სასამართლოს განაჩენი კანონიერი და დასაბუთებულია.
სასამართლომ მიხეილ სააკაშვილი წარდგენილ ყველა მუხლში დამნაშავედ ცნო და საბოლოოდ, სასჯელის სახედ და ზომად თავისუფლების აღკვეთა 6 წლის ვადით დაუნიშნა.
საქმეში არაერთი პირდაპირი მტკიცებულება იყო, რომელიც უშუალოდ მიუთითებდა მიხეილ სააკაშვილის ბრალეულობაზე. მათ შორის იყო პარლამენტის ყოფილი თავმჯდომარის ჩვენება. როცა მასა და მიხეილ სააკაშვილს შორის შეხვედრა შედგა, მას სააკაშვილმა დაუდასტურა რომ ვალერი გელაშვილის ცემა განხორციელდა შეუარცხმყოფელი სტატიის გამო. უფრო მეტიც, პარლამენტის ყოფილ თავმჯდომარეს მიხეილ სააკაშვილმა პირობაც კი მისცა, რომ ეს იქნებოდა ბოლო და პირადი ანგარიშსწორების მიზნით სპეცრაზმს აღარ გამოიყენებდა.
ასევე თავდაცვის ყოფილი მინისტრის ჩვენებით უტყუარად დასტურდებოდა, რომ მიხეილ სააკაშვილი იყო ორგანიზატორი ვალერი გელაშვილის თავდასხმის საქმეზე. ერთ-ერთ შეხვედრაზე სააკაშვილმა მას დაავალა გელაშვილის ცემა, თუმცა როცა მისგან უარი მიიღო, ასეთი დავალება მან შს მინისტრს, ივანე მერაბიშვილს გადასცა. ის აღნიშნულ ეპიზოდში დამნაშავედაა ცნობილი და გამოტანილია გამამტყუნებელი განაჩენი", - აცხადებს ტყეშელაშვილი.
ცნობისთვის, საქართველოს ყოფილი პრეზიდენტი, მიხეილ სააკაშვილი თბილისის საქალაქო სასამართლომ ვალერი გელაშვილის ცემის საქმეზე დამნაშავედ ცნო. მას ბრალი ედებოდა ჯანმრთელობის განზრახ მძიმე დაზიანებასა და სამსახურეობრივი უფლებამოსილების ბოროტად გამოყენებაში.
გამამტყუნებელი განაჩენი მოსამართლე შორენა გუნცაძემ დღეს გამოაცხადა. მან აღნიშნულ გადაწყვეტილებაში პოლიტიკური მოტივი გამორიცხა.
გელაშვილის ცემის საქმეზე სააკაშვილს 6 წლით თავისუფლების აღკვეთა განესაზღვრა, მას ასევე 2 წლით და 3 თვით სახელმწიფო სამსახურში ან ადგილობრივი თვითმმართველობის ორგანოებში დანიშვნითი თანამდებობის დაკავების უფლება ჩამოერთვა.
