„ქუჩის ბიჭების“ წევრის, ირაკლი ნოზაძის დაჭრის ფაქტზე დაკავებულებს ბრალი წარედგინათ.
დაკავებული ორი პირიდან ერთი განზრახ მკვლელობის მცდელობის ბრალდებით, ხოლო მეორე დანაშაულის შეუტყობინებლობის ბრალდებითაა დაკავებული
ერთ-ერთი ბრალდებულის ადვოკატის განცხადებით, საქმე საკმაოდ ვრცელია. მოტივი კი, ფაქტობრივად ბუნდოვანია.
„გამოძიების მხრიდან არის საკმაო შეუსაბამობები, რაც ერთი თვალის გადავლებითაც გახდა ჩემთვის ცნობილი. ყველაფერს გავაკეთებ, რომ 19-108-ე მუხლით წაყენებულ ბრალდებაში ჩემი დაცვის ქვეშ მყოფის სიმართლე დადგინდეს. ის ამ ფორმულირებით წაყენებულ ბრალს არ აღიარებს“, – განაცხადა ერთ-ერთი დაკავებულის ადვოკატმა, ავთანდილ ბუაძემ.
მისი თქმით, დანაშაულის ადგილზე იარაღი ნაპოვნი არ არის.
ერთ-ერთი ბრალდებულის ვერსიით, მან ნოზაძეს ასესხა თანხა, რომელსაც არ უბრუნებდა და შელაპარაკება ამის გამო მოხდა, რასაც დაზარალებულის მხრიდან ხელის დარტყმა მოჰყვა.
ცნობისთვის, ირაკლი ნოზაძე 25 ივნისს დიდუბეში დაჭრეს. დაკავებულია ორი ადამიანი – 1989 წელს დაბადებული თ.ჯ. განზრახ მკვლელობის მცდელობის ბრალდებით, ხოლო მისი მეგობარი – 1994 წელს დაბადებული ნ.თ. დანაშაულის შეუტყობინებლობის ბრალდებით.
