თბილისის სააპელაციო სასამართლოში დღეს, საქართველოს ყოფილი პრეზიდენტის, მიხეილ სააკაშვილის მხრიდან სანდრო გირგვლიანის მკვლელობის საქმეზე სამსახურეობრივი უფლებამოსილების ბოროტად გამოყენების ბრალდების საქმის განხილვა მიმდინარეობდა.
დღევანდელ სხდომაზე დაცვის მხარემ დასკვნითი სიტყვა წარმოთქვა. საქმის პროკურორის, ირაკლი ნადარეიშვილის განმარტებით, სააკაშვილის ადვოკატების მიერ წარმოთქმული დასკვნითი სიტყვა დაუსაბუთებელი და არგუმენტებს მოკლებული იყო.
"დაცვის მხარის დასკვნითი სიტყვა მოვისმინეთ, რასაც დეტალურად ვუპასუხებთ ჩვენი დასკვნითი სიტყვით. არცერთი ის არგუმენტი, რომელიც დაცვის მხარის მიერ იქნა გაჟღერებული, დასაბუთებული და არგუმენტირებული არ იყო", - აცხადებს ნადარეიშვილი.
ის იმედოვნებს, რომ სააკაშვილის მიმართ სააპელაციო სასამართლო პირველი ინსტანციის მიერ გამოტანილ გამამტყუნებელ განაჩენს უცვლელად დატოვებს.
"დიდი იმედი მაქვს, როცა სასამართლო მოისმენს და გაანალიზებს როგორც დაცვის, ასევე ბრალდების დასკვნით სიტყვას, უცვლელად დატოვებს მსჯავრდებულ მიხეილ სააკაშვილის მიმართ არსებულ გამამტყუნებელ განაჩენს სწორედ იმ მტკიცებულებების ერთობლიობის საფუძველზე, რაც ჩვენს მიერ წარდგენილი და გამოკვლეული იქნა.
ჩვენს დასკვნით სიტყვაში იმ ფაქტობრივ უზუსტობებზე გავამახვილებთ ყურადღებას, რომლის შემოტანასაც დაცვის მხარე ხელოვნურად ცდილობს. თუმცა, სასამართლოს ყველა სხდომა ელექტრონულად იწერება და მოსამართლს საშუალება აქვს დეტალურად გაეცნოს იმ მტკიცებულებების გამოკვლევას, რომელშიც შეჯიბრობითობის პრინციპით მონაწილეობდა, როგორც ბრალდების მხარე, ასევე დაცვის მხარე.
აშკარაა, რომ დაცვის მხარე მანიპულირებს ფაქტებით, გარემოებებით, ჩვენებების დამახინჯებით", - აცახდებს ნადარეიშვილი.
ცნობისთვის, სააკაშვილის ადვოკატებმა 2018 წლის 5 იანვარს, თბილისის საქალაქო სასამართლოს მიერ ყოფილი პრეზიდენტისთვის გამოტანილი გამამტყუნებელი განაჩენი გაასაჩივრეს.
სასმართლომ სააკაშვილს სამსახურებრივი უფლებამოსილების ბოროტად გამოყენების ბრალდების საქმეზე სასჯელის სახედ და ზომად 4 წლით თავისუფლების აღკვეთა განუსაზღვრა, რომელიც „ამნისტიის შესახებ“ კანონის საფუძველზე შეუმცირდა ერთი მეოთხედით და საბოლოოდ განესაზღვრა თავისუფლების აღკვეთა 3 (სამი) წლის ვადით. მასვე 2 (ორი) წლის ვადით ჩამოერთვა სახელმწიფო სამსახურში ან ადგილობრივი თვითმმართველობის ორგანოებში დანიშვნითი თანამდებობის დაკავების უფლება, რაც ასევე „ამნისტიის შესახებ“ საქართველოს კანონის გამოყენებით, შეუმცირდა ერთი მეოთხედით და საბოლოოდ 1 (ერთი) წლის და 6 (ექვსი) თვის ვადით ჩამოერთვა სახელმწიფო სამსახურში ან ადგილობრივი თვითმმართველობის ორგანოებში დანიშვნითი თანამდებობის დაკავების უფლება.
მიხეილ სააკაშვილს ბრალად ედებოდა სახელმწიფო-პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენება, საჯარო ინტერესის საწინააღმდეგოდ, თავისთვის და სხვისთვის გამორჩენის და უპირატესობის მისაღებად, რამაც ფიზიკური პირების უფლების და სახელმწიფოს კანონიერი ინტერესის არსებითი დარღვევა გამოიწვია.
სასამართლომ საქმეში წარმოდგენილი და სასამართლო სხდომებზე გამოკვლეულ მტკიცებულებათა ერთობლიობით, დადასტურებულად მიიჩნია, მიხეილ სააკაშვილის მხრიდან, ალექსანდრე გირგვლიანის საქმესთან შემხებლობში მყოფი მაღალი თანამდებობის პირებისათვის, პასუხისმგებლობისაგან გათავისუფლების მიზნით გ. ა-ს, ა. ა.-ს, მ. ბ.-ს და ა. ღ.-ს შეწყალების დაპირება, რაც მოგვიანებით შეასრულა. შესაბამისად, პასუხისმგებლობისგან აცილებულ იქნენ მაღალი თანამდებობის პირები, რამაც დაზარალებულის ოჯახის წევრთა უფლებებისა და სახელმწიფოს კანონიერი ინტერესების არსებით დარღვევა გამოიწვია.
