მოსამართლეს მიხეილ კალანდიას არცერთი ჩვენება არ აქვს გათვალისწინებული, - ასე გამოეხმაურა „ჯი-ეიჩ-ენთან“ ხორავას ქუჩაზე მოკლული დავით სარალიძის მამა, ზაზა სარალიძე მოსამართლე ეკა არეშიძის მიერ გამოტანილი განაჩენის სამოტივაციო ნაწილს, რომელიც მხარეებს გუშინ ჩაბარდათ.
როგორც სარალიძე განმარტავს, რადგან მოსამართლემ მიხეილ კალანდიას არცერთი ჩვენება არ გაითვალისწინა, ის ცრუ ჩვენების მიცემისთვის პასუხისგებაში უნდა მიეცათ.
„პროკურატურას, შინაგან საქმეთა სამინისტროს რეაგირება უნდა მოეხდინა და მკვლელობას რომ თავი დავანებოთ, კალანდია ცრუ ჩვენების მიცემის ნაწილში პასუხისგებაში უნდა მიეცა. როგორც ჩანს, შსს-მ ამ განაჩენის შინაარსი წინასწარ იცოდა და თამაშში ვიღაც მერაბ მორჩაძე შემოიყვანა, რომ მიხეილ კალანდიას შეცვლილი ჩვენება გადაფარონ, რომ თითქოს, მან ჩვენება ზეწოლის ქვეშ მისცა. მორჩაძის წინააღმდეგ ჩვენებას მიხეილ და ლუკა კალანდიები, მათი ბებია და მირზა სუბელიანი აძლევენ. საუბარია, იმაზე, რომ მორჩაძემ კალანდიებს 100 ლარი დაუტოვა და ამით მოქრთამა მოწმე. ნეტა თუ არ რცხვენია შინაგან საქმეთა მინისტრს? ყველანაირად ცდილობენ მიხეილ კალანდიას პასუხისგებაში მიცემის არიდებას, ამით ავტომატურად „აპრავებენ“ სუბელიანსაც“, - აცხადებს ზაზა სარალიძე.
ცნობისთვის, პირვველ დეკემბერს, ხორავას ქუჩაზე მოზარდებს შორის სისხლიან დაპირისპირებას ორი არასრულწლოვნის, ლევან დადუნაშვილისა და დავით სარალიძის სიცოცხლე ემსხვერპლა.
არასულწლოვანის, ლევან დადუნაშვილის განზრახ მკვლელობაში დამნაშავედ ცნობილ გ.ბ-ს სასამართლომ 10 წელი 6 თვე მიუსაჯა, ხოლო დამამძიმებელ გარემოებაში არასრულწლოვან დავით სარალიძის განზრახ მკვლელობის მცდელობაში ბრალდებულ გ.ჯ.-ს 9 წელი და 9 თვე მიესაჯა.
სასამართლოს ამ გადაწყვეტილებით, სარალიძის მკვლელობაში დამნაშავე პირი დაუდგენელია. სწორედ ამას აპროტესტებს მოკლულის მამა, ის დამნაშავეების დასჯას ითხოვს.
