საქმე თეთრი ძაფითაა შეკერილი. ვფიქრობ, მოსამართლეს თავისი გადაწყვეტილება გამზადებული აქვს და უბრალოდ ლეგიმიტაციას უკეთებს ამას, ფორმალური პროცესი აქვს ჩანიშნული, - განაცხადა "ჯი-ეიჩ-ენთან" რუსთაველის გამზირზე ადმინისტრაციული წესით დაკავებული 4 პირის ადვოკატმა, ლევან დავითაიამ.
მან სასამართლო პროცესზე მტკიცებულებების გასაცნობად პროცესის 10 დღით გადადება მოითხოვა, თუმცა, მოსამართლემ დაცვის მხარეს ამისთვის ერთ საათიანი ვადა მისცა.
"ჩვენი მოთხოვნის მიზანი სხდომის გაჭიანურება არ ყოფილა. გვინდოდა რომ მტკიცებულების წარსადგენად გონივრული ვადა მოგვცემოდა. ჩვენ მოსამართლეს აგრეთვე მივმართეთ, იმასთან დაკავშირებით, რომ მტკიცებულებები ასევე წარმოსადგენი იყო საპატრულო პოლიციის მხრიდან. თუმცა, საპატრულო პოლიციის წარმომადგენელმა განაცხადა, რომ რუსთაველის გამზირზე არცერთ პოლიციელს არ გააჩნია სამხრე კამერების ჩანაწერი. წარმოგიდგენიათ, ასეულობით საპატრულო პოლიციიდან არცერთს არ გააჩნია სამხრე კამერების ჩანაწერი. ყველამ ვიცით რომ საპატრულო პოლიცია ამით ადასტურებს თავის ქმედებებს. ამ შემთხვევაში 100 საპატრულო პოლიციის თანამშრომელი ესწრებოდა ამ პროცესს და არცერთს არ ჰქონია სამხრე კამერების ჩანაწერი", - აცხადებს დავითაია.
სასამართლო სხდომაზე ერთ-ერთმა სამართალდამცავმა განაცხადა, რომ მთელი ღამის ნათევები იყვნენ და სამხრე კამერები დაჯდარი ჰქონდათ.
