საგამოძიებო კომისია პირველ სხდომაზე დაზარალებულებს შეხვდება, ხოლო შემდეგ სხდომებზე ყოფილ და მოქმედ მაღალჩინოსნებს დაიბარებს. ამის შესახებ განცხადება „ხორავას ქუჩის“ საქმეზე შექმნილი პარლამენტის დროებითი საგამოძიებო კომისიის თავმჯდომარემ, სერგი კაპანაძემ, გააკეთა.
ამასთან, როგორც მან განაცხადა, პირველ სხდომაზე გამოაქვეყნებენ სხდომის გრაფიკს და იმ პირების სიას, რომლებსაც მომავალ კვირაში მოუწევთ კომისიისთვის ახსნა-განმარტების მიცემა.
„მომავალ კვირას სხდომები გვექნება პრაქტიკულად ყოველ დღე. ინტენსიურად ვიმუშავებთ და ამ შეხვედრებზე დავიბარებთ ადამიანებს. ოთხშაბათსვე გამოვაქვეყნებთ სიას იმ ადამიანებისა, რომლებსაც შემდეგ კვირაში მოუწევთ ახსნა-განმარტებების მიცემა. ჩვენ პირველ რიგში გვექნება შეხვედრები დაზარალებულ მხარესთან, ამის შემდეგ კი გვექნება შეხვედრები როგორც პროკურატურის, ისე შს სამინისტროს თანამშრომლებთან. ჩვენ, სავარაუდოდ, დავიბარებთ ყველა ადამიანს, ვისაც ამ საქმესთან ჰქონდა შემხებლობა და არც ერთი ადამიანი, ყოფილი თუ მოქმედი მაღალჩინოსანი არ იქნება დაზღვეული კომისიაზე მოსვლისგან,“ - განაცხადა სერგი კაპანაძემ.
