მარტივი არ იქნება ამ ყველაფრის გაკეთება, მაგრამ საპარლამენტო უმცირესობა “ევროპული საქართველო”, ეს კომისია, ყველაფერს ვიზამთ, რომ ამ კითხვებზე იყოს პასუხი გაცემული, - ამის შესახებ "ევროპული საქართველოს" წევრმა სერგი კაპანაძემ განაცხადა, რომელიც ხორავას ქუჩაზე მომხდარ მკვლელობის საქმესთან დაკავშირებით შექმნილ საპარლამენტო საგამოძიებო კომისიას უხელმძღვანელებს.
მისი თქმით, გამოვლინდა პროკურატურის სისტემის სრული ჩავარდა, რისი პირდაპირი შედეგი არის ის, რომ დადგინდა კონკრეტული ახალგაზრდების მკვლელები და შემდეგ ამას მოყვა ის პროცესები, რომელიც ჩვენ ყველამ ვნახეთ.
„მიგვაჩნია, შევძლებთ ნათელი მოვფინოთ ამ რთულ სიტუაციას. იმას, რაც მოხდა ხორავას ქუჩაზე და ასევე იმას, რაც მოხდა პროკურატურაში თუ სხვა უწყებებში, რომელმაც გამოიწვია ის შედეგები, რაც ჩვენ გვაქვს. ეს არის რთული სამუშაო. მარტივი არ იქნება ამ ყველაფრის გაკეთება, მაგრამ საპარლამენტო უმცირესობა “ევროპული საქართველო”, ეს კომისია, ყველაფერს ვიზამთ, რომ ამ კითხვებზე იყოს პასუხი გაცემული. ჩვენ გამოვიყენებთ ყველა იმ ბერკეტსა და ინსტრუმენტს, რომელიც კომისიას კანონით აქვს გათვალისწინებული, მათ შორის, უმაღლესი თანამდებობის პირების დაკითხვა, მათი მოწვევა კომისიაზე, სხვა ინფორმაციის გამოწვევა, რომ საზოგადოებამ გაიგოს რეალურად რა მოხდა და ყველა ამ კითხვას გაეცეს პასუხი. ეს არის ძალიან რთული საქმე, ეს არის პირველი შემთხვევა, როდესაც ასეთ ტიპის კომისია იქმნება”, – განაცხადა სერგი კაპანაძემ.
