„ის გადაწყვეტილება, რომელიც საბოლოოდ იქნება მიღებული საპარლამენტო უმრავლესობის მიერ, იქნება განსხვავებული მთელ რიგ საკითხებში ინიცირებული კანონპროექტისგან, მთავარი ჩვენთვის იყო პოზიციების დაახლოება,“ - ეს განცხადება პარლამენტის თავმჯდომარემ, ირაკლი კობახიძემ, საპარლამენტო უმრავლსობის სხდომის დასრულების შემდეგ გააკეთა, სადაც ნარკოპოლიტიკის ლიბერალიზაციის საკითხზე პარტიის თავმჯდომარესთან, ბიძინა ივანიშვილთან ერთად იმსჯელეს.
ირაკლი კობახიძის განცხადებით, საპარლამენტო უმრავლესობის დღევანდელ შეხვედრაზე ნარკოპოლიტიკასთან დაკავშირებით პოზიციები დაახლოვდა. თუმცა, ის კონკრეტიკისგან თავს იკავებს, რადგან, მისივე თქმით, „გარკვეული საკითხების დაკონკრეტება მომავალში პოზიციების კიდევ უფრო მეტად დაახლოებას ხელს შეუშლის“.
როგორც კობახიძე აცხადებს, ნარკოპოლიტიკასთან დაკავშირებით პრინციპებზე ყველა თანხმდება, რომ მომხმარებლებთან მიმართებაში პოლიტიკა ჰუმანური უნდა იყოს, ნარკორეალიზატორებთან მიმართებაში კი, მკაცრი.
„ზოგადად მიდგომაა, რომ უნდა მოხდეს რეგლამენტაცია იმ საკითხების, რომელიც დაკავშირებულია ნარკოტიკების მოხმარებასთან და გასაღებასთან. რჩება განსხავებული მოსაზრებები მთელ რიგ საკითხებთან დაკავშირებით, თუმცა, იმედი მაქვს, რომ საბოლოო ჯამში მოხერხდება პოზიციების მთლიანად დაახლოება. არ არის ისიც გამორიცხული, რომ კენჭისყრა ჩატარდეს თავისუფალ რეჟიმში, როდესაც უმრავლესობის უმრავლესობა იღებს გადაწყვეტილებას. თუმცა, იმედს გამოვთქვამ, რომ მაქსიმალურად დაახლოვდება პოზიციები თითოეულ საკითხთან დაკავშირებით, რომელიც იქნება კანონპროექტში გაწერილი,“ - აღნიშნა ირაკლი კობახიძემ.
მისი თქმით, კანონპროექტზე იურიდიულ საკითხთა კომიტეტმა გადაწყვეტილება ივნისის დასაწყისში უნდა მიიღოს, შემდეგ კი პროექტი პლენარულ სხდომაზე გავა.
„ამოცანაა, რომ საშემოგდომო სესიამდე მივიღოთ გადაწყვეტილება ამ საკითხთან დაკავშირებით. ეს ნიშნავს, იმას, რომ მაქსიმუმ ივნისში სრულდება მორიგი სესია და შეგვიძლია, ივლისში გავაგრძელოთ. მაქსიმუმ ივლისში უნდა მივიღოთ საბოლოო გადაწყვეტილება, ანუ კანონპროექტი, რომელიც დაკავშირებულია ნარკოპოლიტიკასთან,“ - განაცხადა ირაკლი კობახიძემ.
