ფრაქცია „ქართული ოცნების“ თავმჯდომარე, მამუკა მდინარაძე, აცხადებს, რომ საპარლამენტო უმრავლესობის დღევანდელ სხდომაზე, რომელსაც ბიძინა ივანიშვილიც, ესწრებოდა, ნარკოპოლიტიკაზე პოზიციები დაახლოვდა.
ამის შესახებ განცხადება, მამუკა მდინარაძემ შეხვედრის დასრულების შემდეგ ჟურნალისტებათან გააკეთა და აღნიშნა, რომ „პრინციპების დონეზე ყველა შეთანხმებულია, რომ კანონი მომხმარებლების მიმართ ჰუმანური უნდა იყოს, გამსაღებლების მიმართ კი, მკაცრი“.
ამასთან, მდინარაძე აცხადებს, რომ დეტალებზე მომდევნო შეხვედრაზე შეჯერდებიან.
„ჩვენ პრაქტიკულად ყველა საკითხზე შევჯერდით და უფრო დავაახლოვეთ პოზიციები, იქიდან გამომდინარე, რომ უფრო დავაკონკრეტეთ ნარკორეალიზატორების მიმართ იქნება გაცილებით მკაცრი სანქცია, ვიდრე ეს არის დღევანდელ კანონმდებლობაში, დოზებზე პრაქტიკულად დაახლოებით შევჯერდით და კვირის ბოლომდე ალბათ კიდევ უფრო დეტალურად იქნება ეს გავლილი. მოხმარების საკითხებთან დაკავშირებით ასევე შევჯერდით. ის პრინციპი, რომ მომხმარებლების მიმართ იქნება გაცილებით ჰუმანური კანონმდებლობა, ესეც პრაქტიკულად შეთანხმებულია. აქედან გამომდინარე, ჩვენ დაგვრჩა რამდენიმე დეტალი და მომდევნო დღეების განმავლობაში აუცილებლად შევხვდებით ამ დეტალებთან დაკავშირებით. ვფიქრობთ, რომ საბოლოო გადაწყვეტილება იქნება ისეთი მიღებული, რომელიც საზოგადოებრივ ინტერესებში ადეკვატურად და ზუსტად ჩაჯდება,“ - აღნიშნა მამუკა მდინარაძემ.