საპარლემენტო უმრავლესობის წარმომადგენელი, ლევან კობერიძე აცხადებს, რომ ნარკოპოლიტიკის კანონპროექტთან დაკავშირებით შეხვედრა უახლოეს მომავალში შედგება.
ამის შესახებ მან განცხადება "ქართული ოცნების" ოფისში გამართული უმრავლესობის შეხვედრის შემდეგ გააკეთა და აღნიშნა, რომ მისი აზრით, შემდეგ შეხვედრაზე უკვე შესაძლებელი იქნება პოზიციების საბოლოო შეჯერება.
„კონკრეტული პოზიციების დაახლოება მიმდინარეობს. დეტალებზე საუბარი ახლა არასწორია. შიდა პარტიული კულტურიდან გამომდინარე ყოველთვის მივესალმებოდი და ახლაც მივესალმები სარეიტინგო კენჭისყრებს. არ მიმაჩნია, რომ თუკი სარეიტინგო კენჭისყრის ჩატარების საჭიროება დადგება ეს იმის გამოხატულება იქნება, რომ ვინმე რამეზე ვერ თანხმდება, პირიქით, ეს იქნება იმის დადასტურება, თუ რომელი პოზიციისკენ იხრება გუნდში უმრავლესობა. გადაიდგა ჩვენი მხრიდან ნაბიჯები და რადგან არსებობს კითხვა, რომ ხომ არ იქნება ეს ნარკომოხმარებს წახალისების რისკი, ჩვენი მიზანია, რომ ამ თემაზე იყოს მსჯელობა. დარწმუნებული ვარ რომ შემდეგ შეხვედრაზე პოზიციები შეჯერდება“ - განაცხადა ლევან კობერიძემ.
შეგახსენებთ რომ დღეს "ქართული ოცნების" ოფისში აღნშნულ პროექტთან დაკავშირებთ უმრავლესობის შეხვედრა გაიმართა, რომელსაც ბიძინა ივანიშვილიც ესწრებოდა, თუმცა მას კომენტარი ამ საკითხთან არ გაუკეთებია. აკაკი ზოიძის მიერ მომზადებული პროექტი, ნარკოპოლიტიკის ლიბერალიზაციას ითვალისწინებს მომხმარებელთა მიმართ, თუმცა გამსაღებლების მიმართ სანქციები უნდა გამკაცრდეს. ამასთან გათვალისწინებულია ნარკომომხმარებლების მიმართ მზრუნველობის პოლიტიკა.
