ნარკოპოლიტიკასთან დაკავშირებით უმრავლესობაში პოზიციები დაახლოვდა, თუმცა კონსულტაციები გაგრძელდება, - ამის შესახებ საქართველოს პარლამენტის ჯანდაცვის კომიტეტის თავმჯდომარე აკაკი ზოიძემ "ქართული ოცნების" ცენტრალურ ოფისში შეხვედრის დასრულების შემდეგ განაცხადა.
მისი თქმით, საკითხზე შეჯერებული ვარიანტი 7 ივნისისთვის იქნება.
„პრინციპული დაპირისპირება არ გამოიკვეთა არანაირი, მაგრამ ჩვენ დრო დაგვჭირდება იმისთვის, რომ საბოლოო გადაწყვეტილებამდე მივიდეთ. ვადები რჩება ძალაში და 7 ივნისისთვის ჩვენ გვექნება შეჯერებული ვარიანტი. ძალიან ბევრი პოზიცია დაახლოვდა, მაგრამ მსჯელობა გაგრძელდება. აუცილებელი იქნება შეთანხმება დეტალებზე", - განაცხადა აკაკი ზოიძემ, რომელმაც აქვე აღნიშნა, რომ ბიძინა ივანიშვილი ემხრობა ჰუმანურ ნარკოპოლიტიკას, ისევე როგორც გუნდის ყველა წევრი.
მისივე განცხადებით, გადაწყვეტილების მიღება უსასრულოდ არ გაგრძელდება და თუ საჭიროება დადგა, შიდა კენჭისყრა ჩატარდება.
