ნარკოტიკების მოხმარების დეკრიმინალიზაციის შესახებ კანონპროექტზე საბოლოო კენჭისყრა შესაძლოა საგაზაფხულო სესიაზე ვერ მოესწროს. ამის შესახებ განცხადება პარლამენტის ვიცე-სპიკერმა, თამარ ჩუგოშვილმა, ჟურნალისტებთან გააკეთა. თუმცა, როგორც ის აღნიშნავს, კანონპროექტი საგაზაფხულო სესიის დასრულებამდე განხილვის მნიშვნელოვან ფაზას გაივლის. მისი თქმით, აღნიშნული კანონპროექტის დაჩქარებული წესით განხილვა რთული იქნება, რადგან მნიშვნელოვანი საკითხია და მას მსჯელობა სჭირდება.
„ბუნებრივია, ნარკორეალიზაციასთან სახელმწიფო იქნება უკომპრომისო. ასევე ვფიქრობთ, ნარკომომხმარებლებთან დაკავშირებით პოზიცია იქნება სახელმწიფოს მხრიდან უფრო ზიანის შემცირებაზე ორიენტირებული და იმაზე, რომ ნაკლები ნარკოდამოკიდებული გვყავდეს და მეტი ადამიანის გამოხსნა შევძლოთ ჩვენ ნარკოდამოკიდებულებისგან. ზოგადად მკაცრი რეგულირების მომხრე ვართ იმ კონტექსტში, რომ საკონსტიტუციო სასამართლო გარკვეულ გადაწყვეტილებებს იღებს, გარკვეული პროცესები მიმდინარეობს, საქართველოს პარლამენტს გარკვეული ვალდებულებები გააჩნია საკონსტიტუციო სასამართლოს განხილვებიდან გამომდინარე,“ - აღნიშნა თამარ ჩუგოშვილმა.
რაც შეეხება იმას, დეკრიმინალიზაცია შეეხება თუ არა ყველა ნარკოტიკს, ჩუგოშვილი აცხადებს, რომ „შესაძლებელია, ძირითად ნარკოტიკულ საშუალებებთან მიმართებაში შევინარჩუნოთ დაახლოებით ის მიდგომა, რაც არსებობს იმ პირობით, რომ მომხმარებელთან ცოტა განსხვავებული მიდგომა გვაქვს და შესაძლებელია, გარკვეულ შემთხვევებში მკაცრ რეგულირებებზე ვიფიქროთ. უფრო მეტად ვერ დავკონკრეტდები“. დოზებთან დაკავშირებით ჩუგოშვილი აცხადებს, რომ გარკვეული ცვლილებები იქნება, თუმცა, რომელ ნარკოტიკულ ნივთიერებებს შეეხება და რა რაოდენობაზე იქნება საუბარი, ამაზე კომენტირებისგან თავს იკავებს.
„ქართული ოცნების“ ოფისში საპარლამენტო უმრავლესობის შეხვედრა მიმდინარეობს, სადაც ნარკოპოლიტიკის თემაზე მსჯელობენ. შეხვედრას ბიძინა ივანიშვილის ესწრება.
