„ეროვნულ-დემოკრატიული ინსტიტუტის“ (NDI) კვლევის თანახმად, გამოკითხულთა 44% მიიჩნევს, რომ საქართველოს ცენტრალურ ხელისუფლებაში კორუფციის პრობლემა არსებობს. ამ მოსაზრებას არ ეთანხმება გამოკითხულთა 29%. 27% კი ამბობს რომ არ იცის.
კვლევის მიხედვით, მოსაზრებას – „ჩემს ადგილობრივ ხელისუფლებაში (საკრებულოში, მერიაში, გამგეობაში) კორუფციის პრობლემა არსებობს, გამოკითხულთა 40% არ ეთანხმება, 35% ეთანხმება, ხოლო 24%-მა არ იცის.
გამოკითხულთა 51% არ ეთანხმება, რომ საჯარო ინსტიტუტებში (საჯარო რეესტრი, სახელმწიფო საავადმყოფოები, სკოლები და ა.შ) კორუფციის პრობლემა არსებობს, 29% ეთანხმება, ხოლო 19-მა არ იცის.
კვლევის საველე სამუშაოები ჩატარდა 20 მარტი-4 აპრილის პერიოდში, საქართველოს მასშტაბით (ოკუპირებული ტერიტორიების გამოკლებით), 2,194 პირისპირ ინტერვიუს წარმომადგენლობითი შერჩევის საფუძველზე.
NDI-ის კვლევები დიდი ბრიტანეთის მთავრობის UK aid-ის ფინანსური ხელშეწყობით ხორციელდება. გამოკითხვას „CRRC-საქართველო“ ატარებს.
