დღეს საქართველო უფრო დაცული, მომზადებული და ნაკლებ მოწყვლადია, ვიდრე წინა წლებში, ამისთვის მინდა, დიდი მადლობა გადავუხადო ნატო-ს ყველა წევრ ქვეყანას, ვისაც თავისი წვლილი შეაქვს ჩვენი ქვეყნის თავდაცვისუნარიანობის გაძლიერებაში, - ამის შესახებ საქართველოს პარლამენტის თავმჯდომარემ, ირაკლი კობახიძემ ნატო-საქართველოს სახალხო დიპლომატიის ფორუმზე განაცხადა.
მისი თქმით, ისიც უნდა აღინიშნოს, რომ ნატო-ს წევრობის გზაზე ხელშესახები და არსებითი პროგრესის ყოველგვარმა შეფერხებამ შეიძლება გააძლიეროს სკეპტიკოსთა პოზიციები და ზიანი მიაყენოს ევროატლანტიკური ინტეგრაციის პროცესს. მისივე თქმით, მსგავსი საფრთხე ყოველთვის არსებობდა და მომავალშიც იარსებებს.
როგორც კობახიძემ აღნიშნა, ბუქარესტის სამიტიდან, სადაც ნატო-ს წევრი ქვეყნები შეთანხმდნენ, რომ საქართველო აუცილებლად გახდება ალიანსის წევრი ქვეყანა, უკვე 10 წელი გავიდა. გასული 10 წლის განმავლობაში კი, საქართველოს მისწრაფებების პოლიტიკურ მხარდაჭერასთან ერთად, ეტაპობრივად იზრდებოდა ნატო-საქართველოს პრაქტიკული სამხედრო თანამშრომლობა.
„მჯერა, რომ აუცილებელია ნატო-ს ბრიუსელის სამიტზე დაფიქსირდეს არსებითი და ხელშესახები პროგრესი ორგანიზაციაში საქართველოს წევრობის გზაზე. ჩვენი პროგრესის ნათელი გამოვლინება იქნებოდა ჩვენი პროგრესის მხარდამჭერი მკაფიო პოლიტიკური გზავნილები. მათ შორის, სამიტის დეკლარაციაში; საქართველოს თავდაცვისუნარიანობისა და მდგრადობის გასამყარებლად დამატებითი ტექნიკური, ფინანსური თუ სხვა ტიპის პრაქტიკული მხარდაჭერა; მზარდი ერთობლივი სამხედრო წვრთნები; ნატოს ცნობადობისა და ხილვადობის გაზრდა ჩვენს ქვეყანაში; ქართული რეფორმების მკაფიოდ მხარდაჭერა და წახალისება“, – განაცხადა კობახიძემ, რომელმაც აქვე აღნიშნა, რომ ნატო-ს უნდა ჰქონდეს უფრო პროაქტიული ქმედებებით გამყარებული სტრატეგია საქართველოსთან მიმართებაში. მისივე განმარტებით, ამისთვის აუცილებელია იმის გააზრება, რომ ცივი ომის შემდგომი ევროპული უსაფრთხოებისთვის საქართველოს მნიშვნელობა არის განსაკუთრებული.
როგორც კობახიძემ აღნიშნა, საქართველოს ევროატლანტიკურ სტრუქტურებში ინტეგრაცია პარლამენტისთვის განსაკუთრებული მნიშვნელობის საკითხი და პრიორიტეტია და შესაბამისად, საქართველოს მთავრობა მზადააა, ყველა პარტნიორთან და დაინტერესებულ მხარესთან ითანამშრომლოს საქართველოს სტრატეგიული მიზნის მისაღწევად.
