"ექსპერტის ჩვენებით დღეს უტყუარად დადგინდა, რომ ჩემი დაცვის ქვეშ მყოფს გარდაცვლილისთვის სასიკვდილო ჭრილობა არ მიუყენებია, ანუ, დადგინდა რომ იმ დანით, რომლის ფლობასაც ჩემი დაცვის ქვეშ მყოფს ედავებიან, არ არის მიყენებული ჭრილობა, რომლითაც გარდაიცვალა ადამიანი", - აცხადებს ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატი, ტარიელ კაკაბაძე.
ის დარწმუნებულია, რომ სასამართლო განაჩენის გამოტანისას აღნიშნულ მტკიცებულებებს გაიზიარებს.
"მე დარწმუნებული ვარ, რომ თუ სასამართლო ამ მტკიცებულებებს სრულყოფილად და ობიექტურად შეაფასებს, არანაირად არ გაიზიარებს ბრალდების მხარის სრულიად დაუსაბუთებელ პოზიციას", - დასძენს ადვოკატი. მისი განმარტებით, სასამართლოზე წარდგენილი კომპლექსური ექსპერტიზის დასკვნა მნიშვნელოვან კითხვებზე ვერ სცემს პასუხს. "ექსპერტი ვერ ცემს პასუხს კითხვაზე, თუ რამდენი დანა არის გამოყენებული დაჭრის პროცესში. ექსპერტმა ვერ უპასუხა რამდენი დანითაა დაჭრილი დავით სარალიძე, ვერ პასუხობს რომელი დანით რომელი ჭრილობაა მიყენებული, თუმცა გამორიცხავს, იმას რომ იმ დანით, რომლის ფლობასაც ედავებიან ჩემი დაცვის ქვეშ მყოფს, მიყენებულია მომაკვდინებელი ჭრილობები", - აღნიშნავს კაკაბაძე. როგორც ის აცხადებს, მათ მიერ მოწვეული ბრიტანელი ექსპერტები ნივთმტკიცებების კვლევას რამდენიმე დღეში დაიწყებენ.
"ბრიტანელი ექსპერტები დღეს ტოვებენ საქართველოს, თუმცა ისინი რამდენიმე დღეში დაბრუნდებიან და დაიწყებენ მუშაობას ექსპერტიზის ჩატარებაზე. დაცვის მხარეს გვაქვს საკმაოდ მცირე დრო რათა წარმოვადგინოთ ექსპერტიზის დასკვნები.თუმცა ჩვენ ვიმედოვნებთ, რომ ამ ყველაფერს პირველი ინსტანციის განხილვის დასრულებამდე და განაჩენის გამოტანამდე გავაკეთებთ", - განაცხადა კაკაბაძემ.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
