"ლევან დადუნაშვილის ნაწილში არის ერთი სასიკვდილო ჭრილობა და ამ ნაწილში ერთ-ერთი ბრალდებულის დანა მთლიანად გამოირიცხა. დღევანდელ პროცესამდეც ნათელი იყო ჩვენთვის, რომელი ბრალდებულის მიერაა მიყენებული ლევან დადუნაშვილისთვის სასიკვდილო ჭრილობა და დღეს ეს უფრო მკაფიოდ და გარკვევით გამოიკვეთა", - განაცხადა ჟურნალისტებთან ხორავას ქუჩაზე მოკლული ლევან დადუნაშვილის ოჯახის ადვოკატმა, იზო მაღლაკელიძემ.
მისი განმარტებით, დღევანდელ პროცესზე ბრალდებულების ადვოკატებს შორის უთანხმოება მოხდა.
"სრულიად სამარცხვინო მდგომარეობა იყო დღეს პროცესზე. ვიხილავთ ორი ბავშვის განსაკუთრებული სისასტიკით მკვლელობას და ორივე ბრალდებულის ადვოკატი დღეს ფაქტობრივად, ერთმანეთს დაერივნენ იმასთან დაკავშირებით, თუ ვის მიერ იყო მიყენებული ესა, თუ ის ჭრილობა. ძალიან სამარცხვინო ვითარება იყო, რადგან ერთი ბრალდებულის ადვოკატი, მეორე ბრალდებულს აბრალებდა, რომ ეს ჭრილობა მისი დანით იყო მიყენებული და მეორე მხარე საპირისპიროს აკეთებდა. ექსპერტებმა გამორიცხეს რამდენიმე ჭრილობა დავით სარალიძის სხეულზე და ლევან დადუნაშვილის სასიკვდილო ჭრილობა რომ არ არის მიყენებული ერთი დანით. ანუ, ერთ-ერთი დანა კატეგორიულად გამორიცხა ექსპერტმა, რაც შეეხება მეორე დანას, ამაზე მიუთითა, რომ შესაძლებელია ჭრილობა იყოს მიყენებული ამ დანით, ან მსგავსი პარამეტრის და თვისებების მქონე საგნით. ეს არის სტანდარტული დასკვნა. მხოლოდ ექსპერტიზის დასკვნა არ არის დოკუმენტი, რომელსაც უნდა ეფუძნებოდეს განაჩენი. ამ დასკვნასთან ერთად საქმეში არსებულ სხვა მტკიცებულებებთან ერთობლიობაში უნდა დადგეს განაჩენი", - აცხადებს მაღლაკელიძე.
ის გულისტკივილს გამოთქვამს, რომ მოწმეები პროკურატურასთან არ თანამშრომლობენ. ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
