"ექსპერტს, რომელიც დღეს დაიკითხა, დარწმუნებული ვარ, არც კი წაუკითხავს ექსპერტის დასკვნა, ისე მოაწერა ხელი", - განაცხადა ჟურნალისტებთან ხორავას ქუჩაზე მოკლული დავით სარალიძის მამამ, ზაზა სარალიძემ.
მას მსგავსი შთაბეჭდილება მას შემდეგ დარჩა, რაც დღევანდელ სხდომაზე დაკითხულმა ერთ-ერთმა ექსპერტმა განაცხადა, რომ სარალიძის ჭრილობების ნუმერაციისას მექანიკური შეცდომა დაუშვა.
"ექსპერტმა სასამართლოს ბოდიში მოუხადა იმასთან დაკავშირებით, რომ მექანიკური შეცდომა იყო დასკვნაში დაწერილი.... ჩამოთვლილი იყო რამდენიმე ჭრილობა, მათ შორის ის მე-11 ჭრილობა, რომელიც ჩემი შვილის სხეულზე იყო მიყენებული. ექსპერტს მე-11- ს ნაცვლად, მე-13 უნდა დაეწერა, მექანიკური შეცდომა დაუშვა, საგანგაშო არაფერია, მაგრამ ექსპერტს, რომელიც დაიკითხა, დარწმუნებული ვარ, არც კი წაუკითხავს ექსპერტის დასკვნა ისე მოაწერა ხელი. დღეს ორი ექსპერტი დაიკითხა, ერთი, რომელმაც ჩემი შვილის და ლევან დადუნაშვილის ტანსაცმელი გამოიკვლია, მეორე ექსპერტმა კი, დანებთან დაკავშირებით ისაუბრა. ვერცერთმა კონკრეტულად ვერ დაასახელა საქმეში არსებული დანების ზუსტი გამოყენება, მით უმეტეს, რომელ ჭრილობაზე რომელი დანა იყო გამოყენებული. არც ადასტურებენ, არც გამორიცხავენ. შესაძლებელია ამ დანებით იყო მიყენებული ჭრილობები, ან მსგავსი პერიფერიების მქონე სხვა იარაღით. ექსპერტმა თავის თავზე აიცილა ზუსტი პასუხისმგებლობა რომ დაედგინა, თუ რომელ ჭრილობაზე რომელი იარაღი იყო გამოყენებული. პროკურატურა აცხადებს რომ დეტალურად გამოიკვლია ყველაფერი და საქმიდან გამომდინარე ზუსტი მტკიცებულება წარმოადგინეს ექსპერტებმა. როგორც აქამდე ვამბობდი, იგივე პოზიცია მაქვს ახლაც, გამოძიებაზე საკმაო ზეწოლა ხორციელდება და საქმეს ხლართავენ ისე, როგორც თვითონ უნდათ. პროკურატურამ ხომ წარმოადგინა 2 ბრალდებული, ამათ უნდა მიესაჯოს და ეს მოცემულობა მიჰყავთ ბოლომდე", - აცხადება სარალიძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
