"ექსპერტებთან ექსპერტიზის დასკვნაზე უმნიშვნელოვანესი შეკითხვები გვექნება. დასკვნაში არის გარკვეული წინააღმდეგობები და აღნიშნულ საკითხზე ჩვენ აუცილებლად გავამახვილებთ ყურადღებას", - აცხადებს ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატი, ტარიელ კაკაბაძე. როგორც ის განმარტავს, ბრალდების მხარეს ექსპერტიზის ჩასატარებლად 4 თვე დასჭირდა,შესაბამისად, რთულია, მათ ალტერნატიული ექსპერტიზის ჩატარება ერთი თვის ვადაში მოასწრონ.
"ჩვენ ამ დროისთვის არ გვაქვს გადმოცემული ნივთმტკიცებები, შესაბამისად შეუძლებელი იყო, ჩვენს ექსპერტებს დაეწყოთ მუშაობა. დაცვის მხარეს, მეორე ბრალდებულის ადვოკატს ნივთმტკიცებები გადაეცემა ორშაბათს და ამის შემდეგ დაიწყება ექსპერტიზის ჩატარება. შეუძლებელია გაარკვიო რომელი დანით, რომელი ჭრილობა იყო მიყენებული, შეუძლებელია გაარკვიო საქმეში არსებული დანებით არის თუ არა ჭრილობები მიყენებული, თუ ის დანები, რომლებიც საქმეში არსებობს არ გადაეცა ექსპერტს.
საქმის განხილვის დასრულებამდე ერთი თვეა დარჩენილი, ბრალდების მხარეს კი 4-5 თვე დასჭირდა თავისი ექსპერტიზის დასკვნის წარსადგენად. ამ მოკლე დროში ძალიან რთულია წარმოვადგინოთ ექსპერტიზის დასკვნა, თუმცა დაცვის მხარე ყველაფერს გავაკეთებთ, რომ ამ ვადაში, პირველივე ინსტანციაში წარმოვადგინოთ დასკვნა, დავკითხოთ უცხოელი ექსპერტები, რომლებიც აუცილებალდ დამაჯერებლად უპასუხებენ ყველა იმ შეკითხვას, რომელიც მხარეებს ექნებათ", - აცხადებს კაკაბაძე. ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
