ლატვიური ავიაკომპანია airBaltic-ი საქართველოს მიმართულებით სიხშირეებს ზრდის.  ავიაკომპანია რიგა-თბილისი-რიგის მარშრუტზე კვირაში 3 სიხშირით დაფრინავს, თუმცა სამომავლოდ სიხშირეების ზრდას გეგმავს.

ავიაკომპანიამ სიხშირეების გაზრდაზე სამოქალაქო ავიაციის სააგენტოში განაცხადი უკვე შეიტანა და ახალი განრიგის თანახმად, მალე კვირაში 6 სიხშირით იფრენს.

"საქართველოს აეროპორტების გაერთიანების“ ხელმძღვანელის ქეთი ალექსიძის განმარტებით, airBaltic-ი მაისიდან კვირაში 4 სიხშირით იფრენს, ხოლო ივნისი-სექტემბერის პერიოდში კი კვირაში 6 სიხშირით.

ქეთევან ალექსიძე ამბობს, რომ სიხშირეების ზრდაზე დადებითი გადაწყვეტილების მიღწევა ესპანეთის ქალაქ ბილბაოში  ავიამიმართულებების განვითარების ყოველწლიური ფორუმის ‘’Route Europe 2018“-ის ფარგლებში გამართულ შეხვედრაზე მოხდა.  

სამოქალაქო ავიაციის სააგენტოს ბოლო წლების სტატისტიკური მაჩვენებლებით, საქართველოს აეროპორტებიდან გადაყვანილი მგზავრთნაკადის მიხედვით ავიაკომპანია ბაზრის 1%-ის მფლობელია.

2016 წელს  airBaltic-ი 33 ათას 958 მგზავრს მოემსახურა, 2017 წელს კი 39 ათას 777 მგზავრს.

რაც შეეხება მიმდინარე წლის იანვარ-მარტის მაჩვენებლებს, ავიაკომპანიას ბაზრის ისევ 1%-იანი წილის მფლობელია და საანგარიშო პერიოდში 5244 მგზავრი ყავს გადაყვანილი.