ხორავას ქუჩაზე მომხდარ მკვლელობაში ერთ-ერთი ბრალდებულის, გ.ჯ.–ს დაცვის მხარის მოწვევით თბილისში იმყოფებიან დიდი ბრიტანეთის წამყვანი ექსპერტ–კრიმინალისტები ჯეისონ პეინი–ჯეიმსი და სიუ კარნი. ცნობილი ბრიტანელი ექსპერტები დამოუკიდებელი სასამართლო ექსპერტიზის ცენტრ ,,ვექტორის“ სპეციალისტებთან ერთად 1 დეკემბერს მომხდარი დანაშაულის საქმეზე კომპლექსურ ექსპერტიზას ჩაატარებენ. კვლევაზე ექსპერტთა ჯგუფი გრიგოლ რობაქიძის სახელობის უნივერსიტეტის კრიმინალისტიკურ ლაბორატორიაში იმუშავებს.
ჯეისონ პეინი-ჯეიმსი არის დამოუკიდებელი სპეციალისტი კრიმინალისტიკისა და სასამართლო მედიცინის სფეროში. როგორც სამედიცინო ექსპერტი ის საქმიანობს დიდ ბრიტანეთსა და საზღვარგარეთ. ის 25 წლის მანძილზე მუშაობდა ექიმ-კრიმინალისტად ლონდონში. ჯეისონ პეინი–ჯეიმსი არის საპატიო კლინიკური წამყვანი ლექტორი კამერონის სასამართლო მედიცინის მეცნიერებათა სფეროში; დიდი ბრიტანეთის დანაშაულის ეროვნული სააგენტოს და ეროვნული ტრავმების მონაცემთა ბაზის კონსულტანტი; სასამართლო მედიცინის ევროპული საბჭოს აღმასრულებელი კომიტეტის წევრი; არის, აგრეთვე, წამების მსხვერპლთა საერთაშორისო სარეაბილიტაციო საბჭოს საერთაშორისო სასამართლო ექსპერტიზის ჯგუფის წევრი.
ქ–ნი სიუ კარნი არის მეცნიერ-კრიმინალისტი კონსულტანტი და დამოუკიდებელი კრიმინილისტიკის საკონსულტაციო და სასწავლო კომპანია Ethos Forensics დირექტორი. კრიმინალისტიკის ლექტორი ცენტრალური ლანკაშერის უნივერსიტეტში. გამოცდილი ექსპერტი ბიოლოგი; მას არაერთხელ აქვს წარდგენილი საექსპერტო დასკვნა დიდი ბრიტანეთის სამეფო სასამართლოში; არის დიდი ბრიტანეთის შინაგან საქმეთა სამინისტროს გამოყენებითი მეცნიერებისა და ტექნოლოგიის ცენტრის კრიმინალისტიკური დნმ-ის ექსპერტთა საზოგადოების წევრი; სასამართლო ექსპერტიზისა და პოლიციის სამსახურების ასოციაციის აღმასრულებელი საბჭოს წევრი; დიდი ბრიტანეთის მსაჯულთა საზოგადოების პროფესიული წევრი.
,,ჩვენი ფუნქცია, როგორც ექსპერტების არის ის, რომ დავადგინო ფაქტები ჩემი გამოცდილების და კომპეტენციის ფარგლებში, მივაწოდო მიუკერძოებელი მოსაზრება სასამართლოს და დავეხმარო მას მიუკერძოებელი და სამართლიანი განაჩენის გამოტანაში. ამისატვის მნიშვნელოვანია მოვიპოვოთ წვდომა ნივთმტკიცებებზე, რატა შევძლოთ მათი დამოუკიდებლად შესწავლა. გასაკვირია, რომ სახელმწიფო ექსპერტიზის დასრულებას დიდი დრო დასჭირდა. ჩვენ გვაქვს ძალზედ შემჭიდროებული ვადები, რათა შევისწავლოთ მასალა და დავდოთ დასკვნა. მაქსიმალურად შევეცდებით ოპტიმალურად გამოვიყენოთ ვადა და ხელი შევუწყოთ ობიექტური ჭეშმარიტების დადგენას. იმედს ვიტოვებთ ნივთმტკიცებების შენახვის წესები სათანადოდ იქნება დაცული და შენარჩუნებული იქნება ისინი პირვანდელი სახით, რათა მაქსიმალური ინფორმაცია მივიღოთ მათგან“ - აცხადებენ უცხოელი ექსპერტები.
როგორც ცნობილია, პროკურატურამ რამდენიმე დღის წინ წარადგინა სასამართლოში სახელმწიფო კომპლექსური ექსპერტიზის დასკვნა. საპროცესო კოდექსის მიხედვით მხოლოდ ამის შემდეგ გადაეცემა ალტერნატიული ექსპერტიზისთვის საექსპერეტო მასალა მხარეებს. თავდაპირველად ნივთმტკიცებებს ბრალდებულ გ.ბ.–ს დაცვის მხარის დამოუკიდებელი ექსპერტი შეისწავლის. მხოლოდ ამის შემდეგ იქნება ხელმისაწვდომი ნივთმტკიცებები ბრალდებულ გ.ჯ.–ს დაცვის მიერ მოწვეული ექსპერტებისთვის.
სასამართლო განხილვა თბილისის საქალაქო სასამართლოში მაისის ბოლოს დასრულდება.
