12 აპრილს, 14:00 საათზე, სასტურმოში „თბილისი მარიოტი“, სააგენტოს „აწარმოე საქართველოში“ და ევროპის განათლების ფონდის (ETF) ორგანიზებით, გაიმართება შეხვედრა „თანამშრომლობის ხელშეწყობა განათლებასა და ბიზნესს შორის,“ რომელიც ტურიზმისა და მასპინძლობის ინდუსტრიაში მოღვაწე კომპანიებისა და უმაღლესი და პროფესიული საგანმანათლებლო დაწესებულებების წარმომადგენლებს შორის შედგება.
აღსანიშნავია, რომ შეხვედრის მიზანია აღნიშნულ ინდუსტრიებს შორის თანამშრომლობის განვითარებისთვის ჩატარებული კვლევის პირველადი შედეგების გაცნობა და მასპინძლობის ინდუსტრიაში მოღვაწე კომპანიების დაკავშირება პროფესიული განათლების სექტორთან, რათა განხორციელდეს კვლევის დასკვნითი ფაზა, რომელმაც უნდა მოიცვას რეკომენდაციები ამ თანამშრომლობის გაუმჯობესებისთვის. კვლევის მიზანია, სასტუმრო და მასპინძლობის ინდუსტრიასთან დაკავშირებული სამუშაო ძალის უნარ-ჩვევების განვითარება, რაც ინდუსტრიაში მცირე და საშუალო ბიზნესის მეტ ეფექტურობას განაპირობებს. აღსანიშნავია, რომ კვლევის ეფექტურად წარმართვისთვის, გამოკითხულ იქნა 20-მდე სასტუმროსა და 10-მდე პროფესიული განათლების დაწესებულების წარმომადგენლები. აღნიშნული კვლევის წინაპირობა 2015-2016 წლებში, სააგენტოს „აწარმოე საქართველოში“ და ევროპის განათლების ფონდის ორგანიზებით (ETF) ჩატარებული „Trainings Needs Assessment” გახდა, რომლის საფუძველზე გამოიკვეთა სასტუმრო ინდუსტრიის დარგში არსებული გამოწვევები.
ღონისძიების ფარგლებში, ჩატარდება პრეზენტაცია, რომელიც დაეთმობა კვლევის პირველი ორი ფაზის შედეგების გაცნობასა და თანამშრომლობის საკითხების მიმოხილვას. პრეზენტაციის დასრულებისთანავე კი, გაიმართება დისკუსია, რომლის შედეგებზე დაყრდნობითაც დასრულდება კვლევის ბოლო, მესამე ფაზა.
ღონისძიებას ტურიზმისა და მასპინძლობის ინდუსტრიაში მოღვაწე კომპანიების და უმაღლესი და პროფესიული საგანმანათლებლო დაწესებულების წარმომადგენლების გარდა დაესწრებიან ევროპის დელეგაციის, საქართველოს შრომის ჯანმრთელობისა და სოციალური დაცვის სამინისტროს, ტურიზმის ეროვნული ადმინისტრაციის, ETF-ისა და განათლების სამინისტროს წარმომადგენლები.
