2018 წლის პირველ კვარტალში ქუთაისის საერთაშორისო აეროპორტში მგზავრთნაკადის 15%-იანი ზრდა დაფიქსირდა. ეკონომიკისა და მდგრადი განვითარების სამინისტროს შპს ,,საქართველოს აეროპორტების გაერთიანების“ ინფორმაციით, 2018 წლის იანვარ-მარტში ქუთაისის საერთაშორისო აეროპორტი 78 ათას 20 მგზავრს მოემსახურა, 2017 წლის ანალოგიურ პერიოდში კი - 67 ათას 892 მგზავრს. 2016 წლის იანვარ-მარტში კი ქუთაისის საერთაშორისო აეროპორტმა 37 ათას 711 მგზავრი გაატარა.
"საქართველოს აეროპორტების გაერთიანების“ ინფორმაციით, 2018 წელს, ქუთაისის საერთაშორისო აეროპორტში ჩამომფრენი მგზავრების 60%-ი საქართველოს მოქალაქეები იყვნენ. უწყების განმარტებითვე, ქუთაისის საერთაშორისო აეროპორტი კვლავ ინარჩუნებს ქართველების საყვარელი აეროპორტის სტატუსს.
3 თვის მაჩვენებლების მიხედვით, ქუთაისის საერთაშორისო აეროპორტიდან ყველაზე პოპულარული და მოთხოვნადი მიმართულება მილანია. სწორედ მთლიანი მგზავრთნაკადის 12%-ი მილანის მიმართულებაზე მოდის. ქუთაისიდან პოპულარულია ასევე ბერლინის მიმართულებაც, რომელზედაც აეროპორტის მთლიანი მგზავრთნაკადის 11%-ი დაფიქსირდა.
წილობრივად 10-10%-იან მაჩვენებლები აქვს ბუდაპეშტის, მემინგენისა და დორტმუნდის მიმართულებებს. 9-9%-იანი წილებს იყოფენ ლარნაკასა და სალონიკის მიმართულებები.
