კატარის სავაჭრო ცენტრი The Mall of Qatar-ის სტუმრები სულისშემკვრელი სანახაობის, ილეთებისა და მოქმედებების მოწმენი გახდებიან, როდესაც ცენტრის სცენას ქართველი მოცეკვავეები, გრავიტაციის დამაძლეველი „მფრინავი ქართველები“ დაიკავებენ.
როგორც Gulf Times-ი წერს, ღონისძიება სავაჭრო ცენტრის სცენაზე, Oasis-ში 5 აპრილიდან 14 აპრილის ჩათვლით ყოველ დღე 18:30 და 20:30 საათზე იმართება.
"კატარის სავაჭრო ცენტრში სტუმრებს შევპირდით ყოველი ვიზიტისას შევთავაზოთ ახალი და აღმაფრთოვანებელი გამოცდილება. ამდენად, მოხარულები ვართ, ვუმასპინძლოთ „მფრინავ ქართველებს“ ჩვენს სცენაზე და ჩვენი სტუმრები სულისშემკვრელი მუსიკალური სანახაობით გავაოგნოთ", - ამბობს კატარის სავაჭრო ცენტრის აღმასრულებელი დირექტორი სტიუარტ ელდერი.
„მფრინავი ქართველების“ გამოსვლით ვიზიტორებისთვის აღტაცება გარანტირებულია, ვინაიდან მოცეკვავეები სავაჭრო ცენტრის Oasis-ს დაიკავებენ.
მათი ცეკვები შესანიშნავად წარმოაჩენს ქართველი ქალების ბუნებრივ გრაციოზულობასა და სილამაზეს, ასევე ქართველი მამაკაცების გამბედაობას, ღირსებასა და პატივისცემას. კაცი შემსრულებლები მსოფლიოს ნებისმიერი სხვა შემსრულებლისგან განსხვავებულ, შთამბეჭდავ ნახტომებს, ბრუნვებსა და უნიკალურ ტექნიკას წარმოადგენენ. ქალი მოცეკვავეების მოძრაობა კი გედის ცურვას მოგაგონებთ, რასაც ემატება ელეგანტურობის განუმეორებელი კომპონენტი, რომელიც ნებისმიერ აუდიტორიას მოაჯადოვებს.
