ბათუმში ახალი ზოოპარკის მშენებლობა იგეგმება, რომელიც ახალი ჩაქვის მხრიდან ბათუმის ბოტანიკური ბაღის მომიჯნავე ტერიტორიაზე გაშენდება. როგორც ბათუმის მერიაში განმარტავენ, ახალი ზოოპარკის მშენებლობის ტერიტორიის განსაზღვრისა და ზოოპარკის მშენებლობასთან დაკავშირებით, დაგეგმილია პროექტის წარდგენა ბათუმის მუნიციპალიტეტის საკრებულოში.
როგორც ცნობილია, ქალაქ ბათუმის მუნიციპალიტეტის საკუთრებაში არსებული ცენტრალური პარკის ტერიტორიაზე მდებარეობს ზოოკუთხე, რომელსაც უჭირავს 16000,00 კვ.მ.-მდე მიწის ნაკვეთი, მასზე განთავსებული 2070 კვ.მ. 18 შენობა-ნაგებობით.
„ზოოკუთხე საჭიროებს შემდგომ განვითარებასა და გაფართოებას, რისი პერსპექტივაც თავისი ადგილმდებარეობის გათვალისწინებით მას არ გააჩნია - ერთი მხრიდან ესაზღვრება საცხოვრებელი კორპუსები და კერძო სახლები, მეორე მხრიდან ცენტრალურ პარკში არსებული ტბა. შესაბამისად, დგება ბათუმის ზოოკუთხის სხვა ტერიტორიაზე გადატანის, ახალი ზოოპარკის მშენებლობის, შესაბამისი საპროექტო და სახარჯთაღრიცხვო დოკუმენტაციის შემუშავების საკითხი.
ახალი ზოოპარკის მშენებლობისათვის შერჩეული იქნა ჩაქვის მხრიდან ბათუმის ბოტანიკური ბაღის მომიჯნავედ მდებარე ტერიტორია, რომლის ფართობი სულ შეადგენს 173338 კვ.მ.-ს. აღნიშნული ტერიტორიის შერჩევა მოხდა იმ გარემოების გათვალისწინებით, რომ იგი იძლევა ზოოპარკის გაფართოების, ბინადართა შემატების, მათი ყოფითი პირობების გაუმჯობესების საშუალებას. ბატანიკური ბაღის მომიჯნავე ტერიტორია ჩართული იქნება ბაღის დამთვალერებელთა მარშრუტში ერთიანი სერვისის მიწოდებით”, აცხადებენ ბათუმის მერიაში.
არსებული ინფორმაციით, საქართველოში არ მოიძებნება ზოოპარკის მშენებლობის დამპროექტებელი სპეციალისტები, რაც იწვევს უცხოელი სპეციალისტების ჩართვის აუცილებლობას.
„ ამ მიმართულებით ქ. ბათუმის მუნიციპალიტეტს დახმარებას უწევს ფონდი „ქართუ“, რომელსაც უკვე დაწყებული აქვს მუშაობა. ფონდი „ქართუ“ ასევე მზადაა ქ. ბათუმის მუნიციპალიტეტის მერიის მიერ ტერიტორიის მომზადებისას დაიწყოს ახალი ზოოპარკის სამშენებლო სამუშაოები.
ქ. ბათუმის მუნიციპალიტეტის მერია თვლის, რომ უნდა განისაზღვროს ქალაქ ბათუმში ახალი ზოოპარკის მშენებლობის ტერიტორია და დროულად გატარდეს ზოოპარკის მშენებლობისათვის ტერიტორიის მომზადებასთან დაკავშირებული ღონისძიებები”, აღნიშნულია ბათუმის მერიის მიერ გავრცელებულ ინფორმაციაში.
