კომპანია „აიფიემ კვლევების“ (IPM) მიხედვით, 2017 წელს, მედიაში ერთ-ერთ ყველაზე აქტიური ლუდის კომპანიად „ქართული ლუდის კომპანია“ დასახელდა, რომელმაც მთელი გამოვლინების 41 % დაიკავა.

ზედმეტია იმაზე ლაპარაკი, თუ რამდენად დიდი მნიშვნელობა აქვს ბიზნესისთვის ეფექტიან რეკლამას და მედიაში აქტიურ გაშუქებას.

მსოფლიო რეკლამის კლასიკოსი დევიდ ოგილვი ამბობდა, რომ „ეფექტურ რეკლამაში ჩადებული ერთი მილიონი ყიდის უკეთ, ვიდრე არაეფექტურობაში ჩადებული ათი მილიონი”. მისივე სიტყვებია ასევე, „წარმატებული რეკლამა – ზუსტად გადმოცემული სარეკლამო მიმართვაა და სწორად არჩეული მედია საშუალება”.

სწორედ წარმატებული მარკეტინგული და სარეკლამო კამპანიის ფონზე ახერხებს „ქართული ლუდის კომპანია“ გაყიდვების სტიმულირებას და ბაზრის წილის ზრდას.

როგორც კომპანიის ხელმძღვანელი კახა კოტრიკაძე განმარტავს, 2017 წელი გაზრდილი კონკურენციის ფონზე, საქართველოს ლუდის ბაზარი საკმაოდ აქტიური იყო.

„გასულ წელს ლუდის ბაზარზე ბევრი მოთამაშე გამოჩნდა, თუმცა მიუხედავად ამისა „ქართული ლუდის კომპანიამ“ მოახერხა ის, რომ გაიმყარა პოზიციები ბაზარზე, გაიუმჯობესა ბაზრის წილი და თავის პორტფელიოში დაიმატა ახალი მიმართულება- ნატურალურ წვენები. საბოლოო ჯამში 2017 წელი საკმაოდ წარმატებულად დავასრულეთ“, - აცხადებს კახა კოტრიკაძე.

„ქართული ლუდის კომპანიის“ ხელმძღვანელის განმარტებით, ლუდისა და ლიმონათის ბაზარზე კომპანია ლიდერ პოზიციაზეა. კომპანიას მნიშვნელოვანი წილი უჭირავს ასევე ნატურალური წვენების სეგმენტშიც.

„ჩერომ“ თავისი ადგილი ნატურალური  წვენების ბაზარზე უკვე დაიმკვიდრა. სწორედ ამიტომ მოხდა ინიცირება ახალი პროექტისა, ესაა ხილის გადამამუშავებელი ქარხნის მშენებლობა. პროექტზე მუშაობა მიმდინარეობს. საბოლოო ჯამში ყველა მიმართულებით პროგრესი გვაქვს და ამ პროგრესის შენარჩუნებას ვაპირებთ. მომხმარებელს მიმდინარე წელს კიდევ უფრო მნიშვნელოვან სიახლეებს შევთავაზებთ. რამდენიმე დღეში დავაანონსებთ ასევე საქართველოში კიდევ ერთი გლობალური ბრენდის შემოყვანას“, აცხადებს კახა კოტრიკაძე.

სწორედ კომპანიის წარმატებაზე მიუთითებს ისიც, რომ საერთაშორისო სარეიტინგო სააგენტო Scope Ratings GmbH -მა ს.ს  „ქართული ლუდის კომპანიას“ ბიზნეს რისკის მიხედვით „BB-“, ხოლო ფინანსური რისკის მიხედვით  „BB“ რეიტინგი  მიანიჭა. „ქართული ლუდის კომპანიაზე“ რეიტინგი მინიჭებულ იქნა ეკონომიკურად სტაბილური და მზარდი  წარმოების, დივერსიფიცირებული პორტფელის,   ბაზრის წილისა და ძლიერი  საბალანსო უწყისის გამო, რაც კომპანიის მიმართ სანდოობის მაღალი ხარისხის და ფინანსური მდგრადობის მაჩვენებელია.

რეიტინგის მინიჭებით საერთაშორისო სარეიტინგო სააგენტოს ექსპერტმა სს ქართული ლუდის კომპანია შეაფასა დადებითად და აღიარა კომპანიის ბიზნესის სტაბილურობა და ფინანსური მდგრადობა. აღნიშნული რეიტინგი საშუალებას მისცემს კომპანიას გამოუშვას ლარის საჯარო ობლიგაცია, რაც დადებითი მოვლენაა როგორც კომპანიის ასევე საქართველოში კაპიტალის ბაზრის განვითარებისთვის.

რეიტინგის მიღებისა და ობლიგაციების გამოშვების პროცესის წარმართვაში სს „ქართული ლუდის კომპანიას“ თიბისი კაპიტალი (თიბისი ბანკის შვილობილი საბროკერო კომპანია) ეხმარება.

საწყის ეტაპზე კომპანია 20 მლნ ლარს ობლიგაციას გამოუშვებს, რომელსაც ადგილობრივ საფონდო ბირჟაზე განათავსებს.