აჭარის ფინანსთა და ეკონომიკის მინისტრმა პოლონეთის რესპუბლიკის ქვემო სილეზიის ვიცე-მარშალთან ივონა კრავჩუკთან შეხვედრა გამართა. ოფიციალურ შეხვედრაზე მინისტრმა ორ ქვეყანასა და რეგიონებს შორის მეგობრულ და მჭიდრო საქმიან ურთიერთობებზე ისაუბრა და აღნიშნა, რომ ვიცე მარშალის ვიზიტი ამ მიმართულებით კიდევ ერთი წინ გადადგმული ნაბიჯი იქნება.
რამაზ ბოლქვაძემ დელეგაციის წევრებს რეგიონის საინვესტიციო შესაძლებლობები, აჭარაში მიმდინარე და დაგეგმილ პროექტები გააცნო. პოლონეთის ოფიციალური დელეგაციის წევრები აჭარის საინვესტიციო პოტენციალის შესახებ ინფორმაციას ასევე გრაფიკული ვიდეოს საშუალებით გაეცნენ.
ივონა კრავჩუკმა ქვემო სილეზიის საინვესტიციო და ეკონომიკურ საკითხებზე ისაუბრა და აჭარასთან ახალი მიმართულებით კავშირების გამყარებაზე გააკეთა აქცენტი.
„ვიცე-მარშალი ძალიან დაინტერესებულია აჭარის რეგიონით, სხვადასხვა სფეროში კერძოდ, ტურიზმის, სოფლის მეურნეობის მიმართულებით ერთობლივი პროექტების განხორციელებით და მე მაქვს მოლოდინი, რომ დღევანდელ სამუშაო შეხვედრებს ექნება თავისი პოზიტიური შედეგები და მალე არაერთი სიახლე გვექნება აჭარაში“-განაცხადა შეხვედრის დასასრულს რამაზ ბოლქვაძემ.
შეხვედრას აჭარის ფინანსთა და ეკონომიკის მინისტრის პირველი მოადგილე დავით მაკარაძე, მინისტრის მოადგილე ლევან დავითაძე, საინვესტიციო დეპარტამენტის უფროსი ვახტანგ ჭეიშვილი და ეკონომიკური განვითარების დეპარტამენტის უფროსი ეკატერინე ბახტაძე ესწრებოდნენ.
