აჭარის საზოგადოებრივ მაუწყებელს, დღეს ანგისის დასახლებაში მცხოვრები კიდევ ერთი მოქალაქე დაუკავშირდა.
კახა ჩიტაძე ამბობს, რომ ხასან ჰელიმიშის 13 ნომერთან ქვეწარმავლები ისევ დააფიქსირეს. მოქალაქე ტელევიზიას ატყობინებს, რომ ბათუმის მერიის შესაბამისს სამსახურს არ დაკავშირებია. ადგილზე კი სადეზინფექციო სამუშაოების ჩასატარებლად ჯერ არავინ მისულა.
როგორც ცნობილია, ბათუმში, დასახლებულ ტერიტორიებზე ქვეწარმავლების გამოჩენის ფაქტები რადენიმე დღის უკანაც დაფიქსირდა. როგორც ბათუმის მერიაში განმარავენ, გასულ წლებში, ზაფხულის სეზონზე მსგავსი ფაქტების გახშირების გამო ბათუმის მერიამ 2018 წლიდან ახალი ღონისძიება აამოქმედა, რომლის ფარგლებში, მოქალაქეთა მომართვის საფუძველზე, ხორციელდება შენობა-ნაგებობების, სარდაფების, სხვენების, საწყობების, სამეურნეო თუ დამხმარე დაწესებულებებისა და მათ ირგვლივ არსებული ტერიტორიების ქვეწარმავლების საწინააღმდეგო სპეციალური პრეპარატებით დამუშავება.
პროგრამის ფარგლებში ასევე გათვალისწინებულია ქვეწარმავლების დაჭერა, ტრანსპორტირება და დაუსახლებელ ტერიტორიაზე გაშვება.
ქვეწარმავლების საწინააღმდეგო ღონისძიებების განსახორციელებლად მოქალაქეებმა უნდა დარეკონ მერიის ცხელ ხაზზე - (0422) 27 26 06, ან განცხადებით მიმართონ მერიის მოქალაქეთა მომსახურების ცენტრს (ლუკა ასათიანის ქ. #25).
ბათუმის მერიაში ამბობენ, რომ ანგისის დასახლებაში მდინარე მეჯინისწყლის მიმდებარე ტერიტორია, მოქალაქეების მოთხოვნის საფუძველზე, ორი დღის წინ შეწამლეს.
გველები საცხოვრებელ სახლებთან ახლოს რამდენიმე დღის წინ შენიშნეს. მოქალაქეები ყვებოდნენ, რომ აღნიშნული გზით სკოლის მოსწავლეებიც გადაადგილდებიან და ეს განსაკუთრებით სახიფათოა.
ავტორი: . .
