4 აპრილს, 12:00 საათზე, სასტუმრო „ჰილტონში“, ბიზნეს ვორქშოფი „ბათუმი-ვროცლავი“ გაიმართება.
შეხვედრას აჭარაში ოფიციალური ვიზიტის ფარგლებში პოლონეთის რესპუბლიკის ქვემო სილეზიის ვიცე მარშალი ივონა კრავჩუკი დაესწრება. ვიცე მარშალთან ოფიციალურ შეხვედრას აჭარის ფინანსთა და ეკონომიკის მინისტრი რამაზ ბოლქვაძე გამართავს. მინისტრი სტუმარს რეგიონის საინვესტიციო შესაძლებლობებს, აჭარაში მიმდინარე და დაგეგმილ პროექტებს გააცნობს. შეხვედრაზე პოლონეთის დელეგაციის წევრებს აჭარის საინვესტიციო პოტენციალის შესახებ გრაფიკული ვიდეოს ნახვის შესაძლებლობა ექნებათ.
ოფიციალური პირები მოგვიანებით ბიზნეს ვორქშოფს „ბათუმი-ვროცლავი“ დაესწრებიან. სტუმრები აჭარის საპრივატიზაციო ობიექტებზე, საქართველოში ბიზნესის დაწყების რეგულაციებზე, რეგიონის ეკონომიკის ძირითად პარამეტრებზე ინფორმაციას მიიღებენ.
ვორქშოფის მონაწილეები სპეციალური პრეზენტაციებით აჭარისა და ქვემო სილეზიის საინვესტიციო, ტურისტულ და სოფლის მეურნეობის კუთხით არსებულ პოტენციალს გაეცნობიან.
შეხვედრის ფარგლებში ქართულ და პოლონურ კომპანიებს შორის პირისპირ შეხვედრები (B2B) გაიმართება, სადაც მხარეები სამომავლო თანამშრომლობაზე ისაუბრებენ.
ბიზნეს ვორქშოფს აჭარის სოფლის მეურნეობის მინისტრი ავთანდილ მესხიძე, აჭარის ტურიზმისა და კურორტების დეპარტამენტის უფროსი სულხან ღლონტი, აჭარასა და ქვემო სილეზიაში მოქმედი კომპანიების (ლოჯისტიკის, ტურიზმისა და სოფლის მეურნეობის სფეროში) ჯამში 100-ზე მეტი წარმომადგენელი დაესწრება.
პოლონეთის ოფიციალური დელეგაციის წევრები არიან: ქვემო სილეზიის პარლამენტის ვიცესპიკერი ჯულიან გოლაკ, ქვემო სილეზიის ხაზინის უფროსი ელზბიეტა ბერეზოვსკა, სასოფლო ტერიტორიების განვითარების კომისიის თავმჯდომარე, ქვემო სილეზიის პარლამენტის წევრი ტომასზ პილავკა, სოფლის მეურნეობის დეპარტამენტის უფროსი ალინა მაჯგიერ, გარემოს დაცვის განყოფილების უფროსი პიოტრ ბლასზკოვ, საერთაშორისო თანამშრომლობის განყოფილების უფროსი კაროლ პრზივარა.
ქვემო სილეზიის ოფიციალური დელეგაცია აჭარას 5 აპრილს დატოვებს.
