2018 წლის თებერვალში, როგორც მოსალოდნელი იყო, წლიური ინფლაცია კიდევ უფრო შემცირდა: წინა წლის შესაბამის თვესთან შედარებით ინფლაციამ 2.7 პროცენტი შეადგინა, ხოლო წინა თვესთან შედარებით ფასების საერთო დონე 0.2 პროცენტით გაიზარდა. თებერვალში, წინა თვესთან შედარებით, ყველაზე აღსანიშნავი მოუხდელი ყველის 5.1 პროცენტით გაიაფება იყო, რომლის გავლენა თვის ინფლაციის მაჩვენებელზე 0.1 პროცენტული პუნქტია (პ.პ.).
როგორც სებ-ის „თვის მიმოხილვაშია” აღნიშნული, გასულ წელს წლიურ ინფლაციის მაჩვენებელზე მნიშვნელოვან როლს თამაშობდა თამბაქოს პროდუქტებისა და საწვავის გაძვირება, რაც ამ პროდუქტებზე აქციზის გადასახადის მატებითა და ნავთობის მსოფლიო ფასების გაძვირებით იყო გამოწვეული. თამბაქოსა და საწვავზე აქციზის გადასახადმა გასული წლის იანვრიდან მოიმატა და აისახა ფასებზე. შესაბამისად, 2018 წლის იანვრიდან, საბაზო ეფექტის გამო, აქციზის გადასახადის გავლენა წლიური ინფლაციის მაჩვენებელზე ამოიწურა, რის გამოც, ამ პერიოდიდან მან შემცირება დაიწყო. თუმცა ერთჯერადი ფაქტორებიდან ძალაში რჩება გაზის გადასახადის მომატება, რომელიც გასული წლის აგვისტოდან მოხდა. ამას დაემატა 2018 წლის იანვრიდან წყლისა და ელექტროენერგიის გადასახადის გაძვირება. აღნიშნული კომუნალური გადასახადების მატების გავლენამ ინფლაციის მაჩვენებელზე თებერვალში 0.4 პ.პ შეადგინა.
