30 მარტს, 11:00 საათზე, ფონდი „ღია საზოგადოება-საქართველოს“ ოფისში (ჭოველიძის 10) კოალიცია თანასწორობისთვის წარმოადგენს ანგარიშს, რომელიც 2016-2017 წლებში კოალიციის წევრი ორგანიზაციების მიერ საერთო და საკონსტიტუციო სასამართლოებში და სახალხო დამცველის აპარატში წარმოებულ დისკრიმინაციის საქმეებს ასახავს.
ანგარიშში შესულია 60 საქმე. საქმეები ეხება დისკრიმინირებული ჯგუფების მდგომარეობას, სამართალწარმოების პროცესს და მის შედეგებს. აქედან, ყველაზე მეტი შეზღუდული შესაძლებლობების მქონე პირთა დისკრიმინაციის შემთხვევაა, რომელსაც მოსდევს დისკრიმინაციის შემთხვევები სქესის, საცხოვრებელი ადგილის (უსახლკარობის გამო), რელიგიის, სექსუალური ორიენტაციის და გენდერული იდენტობის, ეთნიკური, პოლიტიკური და სხვა ნიშნით. ამავე ანგარიშში შესულია სექსუალური შევიწროების შეთმთხვევა, რომელიც საჯარო რეესტრის ეროვნული სააგენტოს წინააღმდეგ იყო მიმართული.
ანგარიშის პრეზენტაციაზე დისკრიმინაციის კერძო შემთხვევებზე თავად მსხვერპლები ისაუბრებენ. კერძოდ, ძირითად მომხსენებლებთან ერთად წარმოდგენილი იქნება ადამიანის უფლებათა აქტივისტი, თავად უსინათლო ესმა გუმბერიძე და აქტივისტი ტრანსი ქალი ნატა.
პრეზენტაციას დაესწრებიან შსს-ს ახლდაშექმნილი ადამიანის უფლებათა დეპარტამენტის, ჯანდაცვის და იუსტიციის სამინისტროების, სახალხო დამცველის და პრეზიდენტის ოფისის წარმომადგენლები.
