ევროპის საბჭო და ევროკავშირი მხარს უჭერს საქართველოს მიერ ფულის გათეთრებისა და ტერორიზმის დაფინანსების წინააღმდეგ ბრძოლის სფეროში (AML/CFT) არსებული კანონმდებლობის საერთაშორისო სტანდარტებთან დაახლოებას
2018 წლის 29 მარტს გაიმართება სამუშაო შეხვედრა საქართველოს სახელმწიფო ხელისუფლების წარმომადგენლებთან „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონპროექტის განხილვის მიზნით.
სამუშაო შეხვედრამდე, „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონპროექტზე ევროპის საბჭოს მიერ შემუშავდა სამართლებრივი დასკვნა. დასკვნა მომზადდა პროექტის „საქართველოში ფულის გათეთრების წინააღმდეგ მებრძოლი ინსტიტუტების გაძლიერება“ ფარგლებში, რომელიც წარმოადგენს ევროკავშირისა და ევროპის საბჭოს პარტნიორობა კარგი მმართველობისათვის ერთობლივ პროექტს.
სამართლებრივი დასკვნა მომზადდა 2017 წელს ევროპის საბჭოს ორი ექსპერტის მიერ საქართველოს ფინანსური მონიტორინგის თხოვნით. ექსპერტებმა დასკვნაში განიხილეს კანონპროექტის შესაბამისობა ფინანსური ქმედების სპეციალური ჯგუფის (FATF) რეკომენდაციებთან (2012), ევროკავშირის ფულის გათეთრების წინაამდეგ ბრძოლის სფეროში არსებულ მე-4 დირექტივასთან, ევროპის საბჭოს სტანდარტებსა და გაეროს შესაბამის რეზოლუციებთან.
შეხვედრაზე მოწვეულ სტუმრებს სიტყვით მიმართავენ ბატონი კრისტიან ურსე, ევროპის საბჭოს ოფისის ხელმძღვანელი საქართველოში და ბატონი ვალერიან ხასაშვილი, ფინანსური მონიტორინგის სამსახურის უფროსი.
სამუშაო შეხვედრა საშუალებას მისცემს შესაბამის ინსტიტუტებს ევროპის საბჭოს ექსპერტებთან ერთან განიხილონ იურიდიულ დასკვნაში მოცემული რეკომენდაციების იმპლემენტაციის შესაძლებლობა კანონპროექტის საერთაშორისო სტანდარტებან შესაბამისობის გაძლიერების უზრუნველყოფის მიზნით.
დაგეგმილ სამუშაო შეხვედრაში მონაწილეობას მიიღებენ წარმომადგენლები ისეთი უწყებებიდან, როგორებიცაა ფინანსური მონიტორინგის სამსახური, ფულის გათეთრებისა და ტერორიზმის დაფინანსების სფეროში ზედამხედველობის განმახორციელებელი პირები, მათ შორის ეროვნული ბანკი, ფინანსთა სამინისტრო, შემოსავლების სამსახური, დაზღვევის სახელმწიფო ზედამხედველობის სამსახური, საქართველოს ადვოკატთა ასოციაცია, ბუღალტრული აღრიცხვის, ანგარიშგებისა და აუდიტის ზედამხედველობის სამსახური, ნოტარიუსთა პალატა, საჯარო რეესტრის ეროვნული სააგენტო, ფულის გათეთრებისა და ტერორიზმის დაფინანსების სფეროში მოქმედი მონიტორინგის განმახორციელებელი პირები და სხვა კომპეტენტური ორგანოები, მათ შორის იუსტიციის სამინისტრო, საქართველოს პროკურატურა, სახელმწიფო უსაფრთხოების სამსახური, პარლამენტი და მთავრობის ადმინისტრაცია.
ღონისძიება იმართება ევროკავშირისა და ევროპის საბჭოს პარტნიორობა კარგი მმართველობისათვის პროექტის „საქართველოში ფულის გათეთრების წინააღმდეგ მებრძოლი ინსტიტუტების გაძლიერება“ ფარგლებში. პროექტი ხორციელდება 2015 წლიდან.
