თბილისში ევროპის საფოსტო ორგანიზაციის PostEurop-ის პლენარული სხდომის და ბიზნეს ფორუმის ჩატარებაზე ისაუბრეს საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა, „საქართველოს ფოსტის“ გენერალურმა დირექტორმა ლევან ჩიკვაიძემ და PostEurop-ის გენერალურმა მდივანმა ბოტონდ სებენმა, შეხვედრა გაიმართა საქართველოს ეკონომიკისა და მდგრადი განვითარების სამინისტროში.
ბოტონდ სებენი საქართველოში PostEurop-ის რიგით 34-ე პლენარული სხდომისა და დაარსებიდან 25-ე წლისთავის აღსანიშნავი ღონისძების წინამოსამზადებელი სამუშაოების დაგეგმვის მიზნით არის ჩამოსული. სხდომა თბილისში 2018 წლის 2-4 ოქტომბერს გაიმართება. ვიზიტის ფარგლებში PostEurop-ის გენერალური მდივანი შეხვედრებს გამართავს საორგანიზაციო ჯგუფთან, რომლის დროსაც დაიგეგმება და გაიწერება სამუშაო სტრატეგია.
შეხვედრაზე აღინიშნა, რომ PostEurop-ის 34-ე პლენარული სხდომის ფარგლებში, საქართველოს 49 ევროპული ქვეყნის 52 საფოსტო ოპერატორის ხელმძღვანელი პირები ეწვევიან. განხილული იქნება საფოსტო რეფორმები, საფოსტო სფეროს განვითარების გეგმები და წევრთა შორის პარტნიორული კავშირების გამყარების შესაძლებლობები. ამასთანავე „საქართველოს ფოსტის“ მხარდაჭერით ჩატარდება ბიზნეს ფორუმი, რომელშიც საფოსტო ბიზნესთან დაკავშირებული კომპანიები მიიღებენ მონაწილეობას.
„ორი წლის წინ „საქართველოს ფოსტას“ ერგო პატივი უმასპინძლოს PostEurop-ის 2018 წლის პლენარულ სხდომას და ბიზნეს ფორუმს. ეს ღონისძიება მეტად მნიშვნელოვანია რადგან აღინიშნება PostEurop-ის დაარსებიდან საიუბილეო 25-ე წელი. აღნიშნულ ღონისძიებას 200-მდე ევროპელი დელეგატი დაესწრება, ჩვენ განვიხილავთ საფოსტო ბიზნესის ყველაზე მნიშვნელოვან საკითხებს და ცვლილებებს რომელსაც საჭიროებენ საფოსტო ოპერატორები, რათა გადაერთონ თანამედროვე ბიზნეს მოდელზე და უპასუხონ ახალ გამოწვევებს, როგორიც არის მაგალითად ელექტრონული კომერცია, რომელიც ერთ-ერთი ყველაზე დიდი გამოწვევაა საფოსტო ბიზნესისათვის საერთაშორისო ბაზარზე წარმატების მისაღწევად. „საქართველოს ფოსტამ“ მოკლე დროში სწორი მენეჯმენტით შეძლო მიეღწია ევროპული სტანდარტებისთვის და მეტად მნიშვნელოვანია ამ გამოცდილების გაზიარება სხვა საფოსტო ოპერატორებისთვის, „საქართველოს ფოსტა“ არის მაგალითი საფოსტო ბიზნესის სწრაფი და სწორი განვითარების, მე ვნახე რეალური შედეგები და ეს უნდა გაიგოს ყველა საფოსტო ოპერატორმა.“ - განაცხადა PostEurop-ის გენერალურმა მდივანმა ბოტონდ სებენმა.
„ევროპული საფოსტო საზოგადოებისთვის ერთ-ერთი ყველაზე მნიშვნელოვანი ყოველწლიური ღონისძიება საქართველოში, ოქტომბრის დასაწყისში თბილისში გაიმართება. ამ ეტაპზე მიმდინარეობს ღონისძიების გასამართად წინამოსამზადებელი სამუშაოები. აღნიშნული ღონისძიება მოიცავს PostEurop-ის პლენარულ სხდომებს და რაც ყველაზე მნიშვნელოვანია ქართული ბიზნესისათვის, მესამე დღეს გაიმართება ბიზნეს ფორუმი. ევროპის ყველა ბიზნესი რომელიც დაკავშირებულია ლოჯისტიკურ და საფოსტო საქმიანობასთან ცდილობს ამ ფორუმზე წარმოადგინოს ინოვაციური პროდუქტები, პროექტები და ხედვები. ეს არის შესაძლებლობა როგორც ევროპელი, ასევე ქართველი მეწარმეებისა და ბიზნესმენებისათვის ახალი კონტაქტების დამყარების და მათი ლოჯისტიკური სქემების გაფართოებისათვის.“ - განაცხადა „საქართველოს ფოსტის“ გენერალურმა დირექტორმა ლევან ჩიკვაიძემ.
PostEurop წარმოადგენს ევროპის საზოგადოებრივ საფოსტო კავშირს, რომელიც 1993 წელს ბრიუსელში დაარსდა. ორგანიზაციის მიზანია ხელი შეუწყოს საფოსტო ბიზნესის განვითარებას და წევრთა შორის პარტნიორული კავშირების გამყარებას, ასევე საერთაშორისო საფოსტო პროდუქტების მდგრად ზრდას და უწყვეტ ინოვაციას. „საქართველოს ფოსტა“ 2012 წლიდან წარმოდგენილია PostEurop-ის სრულუფლებიან წევრად.
„საქართველოს ფოსტა“ წარმოადგენს ქვეყანაში უმსხვილეს საფოსტო ორგანიზაციას, რომელიც გამოირჩევა როგორც მომსახურების დიდი არჩევანით, ასევე სერვის ცენტრების ყველაზე ფართო ქსელით. დღეს „საქართველოს ფოსტა“ 82 სერვის ცენტრით არის წარმოდგენილი მთელი ქვეყნის მასშტაბით.
