საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოსა და „საქაერონავიგაციის“ მასპინძლობით, თბილისში სამოქალაქო ავიაციის საერთაშორისო ორგანიზაციის საავიაციო უსაფრთხოების გლობალური გეგმის სამუშაო ჯგუფის (GASP-SG) შეხვედრა იმართება. ღონისძიება სასტუმრო „თბილისი მარიოტში“ ოფიციალურად დღეს გაიხსნა.
შეხვედრაზე ICAO-ს, აშშ-ს, დიდი ბრიტანეთის, თურქეთის, საუდის არაბეთის, მოლდოვის და საქართველოს საავიაციო ხელისუფლებების წარმომადგენლებმა, აგრეთვე, საავიაციო ინდუსტრიის ექსპერტებმა იმსჯელეს საავიაციო უსაფრთხოების გლობალური გეგმით ქვეყნებისა და რეგიონებისთვის დადგენილ უსაფრთხოების სტანდარტებზე, საავიაციო უსაფრთხოების დონის განსაზღვრის ძირითად ინდიკატორებზე, დარგის მიმდინარე და გრძელვადიანი განვითარების პრიორიტეტებზე. ორ დღიანი ღონისძიების ფარგლებში, სამოქალაქო ავიაციის სააგენტოსა და საქაერონავიგაციის წარმომადგენლებს შესაძლებლობა ექნებათ მონაწილეებს გააცნონ საავიაციო უსაფრთხოების გაუმჯობესების და საჰაერო ნაკადების მართვის მოდერნიზების კუთხით საქართველოში მიღწეული პროგრესი.
ICAO-ს სამდივნოს ეგიდით შექმნილი სამუშაო ჯგუფის მიზანს, საავიაციო უსაფრთხოების გლობალური გეგმის (GASP, Doc 10004) ახალი, 2020-2022 წლების გამოცემის შემუშავება წარმოადგენს. 2017 წლიდან, წამყვანი საერთაშორისო ორგანიზაციებისა და საავიაციო ხელისუფლებების ექსპერტებთან ერთად, აღნიშნული ჯგუფის მუშაობაში მონაწილეობას იღებს საქართველოს წარმომადგენელი - სამოქალაქო ავიაციის სააგენტოს დირექტორის პირველი მოადგილე ლევან კარანაძე.
2016 წელს, საქართველომ პირველად გადააჭარბა ICAO-ს საავიაციო უსაფრთხოების გლობალური გეგმით დადგენილ 60%-იან მაჩვენებელს და 64.76%-იანი შედეგი აჩვენა. მიმდინარე წლის 13-20 მარტს, სამოქალაქო ავიაციის სააგენტოში ჩატარებული აუდიტის წინასწარი შედეგებით კი, ქვეყნის საერთო მაჩვენებელი 87.50%-მდე გაიზრდება.
ICAO-ს საავიაციო უსაფრთხოების გლობალური გეგმის სამუშაო ჯგუფში მონაწილეობა და ღონისძიების მასპინძლობა წარმოადგენს მგზავრთა და ფრენების უსაფრთხოების კუთხით საქართველოს მიერ დასახული კურსის კიდევ ერთ აღიარებას საერთაშორისო დონეზე.
აღსანიშნავია, რომ სამოქალაქო ავიაციის საერთაშორისო ორგანიზაციის (ICAO) სამდივნო საავიაციო უსაფრთხოების გლობალური გეგმის (GASP, Doc 10004) განახლებას ახორციელებს. დოკუმენტის მეოთხე რედაქციის შემუშავების მიზნით ,შეიქმნა ექსპერტთა ჯგუფი, რომლის მუშაობაშიც საქართველოს წარმომადგენელი პირველად იღებს მონაწილეობას.
ICAO-ს სამდივნოსთვის სამოქალაქო ავიაციის სააგენტოს დირექტორის მოადგილის - ლევან კარანაძის კანდიდატურა ორგანიზაციის ევროპული და ჩრდილო-ატლანტიკური ბიუროს (EUR/NAT) მიერ იქნა წარდგენილი.
საავიაციო უსაფრთხოების გლობალური გეგმის განახლებაზე ექსპერტთა ჯგუფი (GASPSG) 2017 წლის აპრილიდან 2019 წლის თებერვლის ჩათვლით იმუშავებს. ჯგუფი დაკომპლექტებულია სხვადასხვა რეგიონის საავიაციო ხელისუფლებების, საერთაშორისო ორგანიზაციებისა და ინდუსტრიის წარმომადგენლებისაგან. პირველი შეხვედრა ICAO-ს სათავო ოფისში აპრილის დასაწყისში გაიმართა. ექსპერტთა მიერ შემუშავებული დასკვნები და რეკომენდაციები GASP-ის 2020-2022 წლის გამოცემაში აისახება.
საავიაციო უსაფრთხოების გლობალური გეგმა (GASP, Doc 10004) წარმოადგენს სტრატეგიულ დოკუმენტს სამოქალაქო ავიაციის სფეროში, რომელიც განსაზღვრავს დარგის მიმდინარე და გრძელვადიანი განვითარების პრიორიტეტებს, ICAO-ს წევრი სახელმწიფოების მიერ სტანდარტებისა და რეკომენდირებული პრაქტიკის (SARPs) ეფექტური იმპლემენტაციისა და საავიაციო უსაფრთხოების დონის განსაზღვრის ძირითად იდნიკატორებს ქვეყნებისა და რეგიონებისთვის.
