საქართველოს გარემოს დაცვისა და სოფლის მეურნეობის სამინისტროს, სურსათის ეროვნული სააგენტოს, გაეროს სურსათისა და სოფლის მეურნეობის ორგანიზაციის (FAO) და აშშ-ის თავდაცვის საფრთხის შემცირების სამსახურის (DTRA) ორგანიზებით, საქართველოში სპეციალისტთა ტრანს-სასაზღვრო შეხვედრა მიმდინარეობს. აღნიშნული პროგრამა გულისხმობს საქართველოსა და სომხეთს შორის მჭიდრო თანამშრომლობას ჯანდაცვის, ვეტერინარიისა და დაავადებათა მიკვლევადობის კუთხით და ითვალისწინებს რეგულარულ შეხვედრებს, დაავადებების საწინააღმდეგო ღონისძიებების შესახებ ინფორმაციის გაცვლას და დაგეგმვას.
სურსათის ეროვნული სააგენტოსთვის საქართველო-სომხეთის თანამშრომლობას განსაკუთრებული მნიშვნელობა აქვს, როგორც დაავადებათა პრევენციის, ასევე საქონლისა და ხორცის ექსპორტისათვის, ვინაიდან საერთაშორისო ვაჭრობისას ყურადღება ექცევა არა მხოლოდ ქვეყნის შიგნით არსებულ ეპიდემიოლოგიურ მდგომარეობას, არამედ მთლიანად რეგიონს.
“ტრანს-სასაზღვრო თანამშრომლობის ფარგლებში, მხარეები ერთობლივად გეგმავენ დაავადებათა საპრევენციო ღონისძიებებს, რაც უზრუნველყოფს ეპიზოოტიური და ეპიდემიოლოგიური გარემოს და სურსათის უვნებლობის ხარისხის გაუმჯობესებას“- განაცხადა სურსათის ეროვნული სააგენტოს ვეტერინარიის დეპარტამენტის უფროსმა ლაშა ავალიანმა.
2016 წლიდან სურსათის ეროვნულ სააგენტოს ცხოველთა იდენტიფიკაციის სისტემის (NAITS) იმპლემენტაციაში გაეროს სურსათისა და სოფლის მეურნეობის ორგანიზაცია (FAO) ეხმარება. იდენტიფიკაციის სისტემის ერთ-ერთი მნიშვნელოვანი კომპონენტია მიკვლევადობა, რომელიც გულისხმობს როგორც ცხოველთა დაავადებების კონტროლს, ასევე ცხოველიდან ადამიანზე გადამდები დაავადებების პრევენციას.
FAO-ს ცხოველთა იდენტიფიკაციის პროგრამის მენეჯერის მიხეილ სოხაძის განმარტებით, „ცხოველთა იდენტიფიკაციის პროგრამის უმნიშვნელოვანესი კომპონენტია მიკვლევადობა, რაც გულისხმობს საფრთხის დროულად იდენტიფიცირებას და იდენტიფიცირების შემდგომ - მის ეფექტურ ლიკვიდირებას. საქართველოსა და სომხეთს აქტიური სავაჭრო თანამშრომლობა აქვთ, შესაბამისად, ორივე მხარის ინტერესშია რეგიონში კეთილსაიმედო ეპიდემიოლოგიური გარემოს არსებობა“.
ტრანს-სასაზღვრო თანამშრომლობის პროცესში ჩართულია აშშ-ის თავდაცვის საფრთხის შემცირების სამსახური (DTRA), რომელიც აქტიურ მონიტორინგს უწევს განსაკუთრებით საშიშ პათოგენებს.
სამუშაო შეხვედრა, დღეს, 20 მარტს საველე ვიზიტების შემდგომ დასრულდება.
