დღეს, სასტუმრო „თბილისი მარიოტში“ ქალთა მიმართ ძალადობის ეროვნული კვლევის პრეზენტაცია გაიმართა.
ქალთა მიმართ ძალადობის ეროვნული კვლევა საქართველოში გაეროს ქალთა ორგანიზაციისა და საქსტატის ერთობლივი ძალისხმევითა და ევროკავშირის მხარდაჭერით ჩატარდა პროექტის ფარგლებში „ერთად დავძლიოთ ქალთა მიმართ ძალადობა“.
კვლევის შედეგად, 2009 წლის შემდეგ პირველად განხორციელდა ეროვნული მასშტაბის მონაცემების მოპოვება ქალთა მიმართ ძალადობის, მათ შორის ოჯახში ძალადობისა და სექსუალური ძალადობის შესახებ, ასევე ქალთა მიმართ ძალადობის საკითხებზე მოსახლეობის დამოკიდებულებებისა და აღქმების შესახებ. პირველად საქართველოში, კვლევამ ასევე შეისწავლა სექსუალური შევიწროებისა და ადევნების საკითხები ეროვნული მასშტაბით.
კვლევის საველე სამუშაოები 2017 წლის განმავლობაში მიმდინარეობდა. კვლევა მოიცავდა რაოდენობრივ და ხარისხობრივ კომპონენტებს. რაოდენობრივი კვლევის ფარგლებში ქვეყნის მასშტაბით გამოიკითხა 15-64 წლის 6006 ქალი და 15-64 წლის 1601 კაცი, ხოლო ხარისხობრივი კვლევის ფარგლებში ჩატარდა 15 ექსპერტული ინტერვიუ, 12 ჩაღრმავებული ინტერვიუ და 20 ფოკუს ჯგუფების დისკუსია.
კვლევის შედეგები ავსებს იმ ვაკუუმს, რომელიც საქართველოში ქალთა მიმართ ძალადობასთან დაკავშირებულ მონაცემებში აქამდე არსებობდა და წარმოადგენს დროულ, საბაზისო მონაცემებს ნაციონალიზებული მდგრადი განვითარების მიზნების ინდიკატორებისთვის. კვლევის შედეგები, ასევე უზრუნველყოფს მტკიცებულებებს პოლიტიკის შემუშავებისათვის, როგორც ეროვნულ დონეზე, ისე ევროკავშირის გენდერული თანასწორობის შესახებ სტრატეგიული ჩართულობის 2019 წლის დოკუმენტის მიზნებისათვის.
ცნობისთვის, კვლევის მიხედვით, საქართველოში ქალებისა და კაცებისთვის ქალთა მიმართ ძალადობა დიდწილად კვლავაც მისაღებია.
ამავე კვლევაზე დაყრდნობით, საქართველოში 7-დან 1 ქალს ოჯახში ძალადობა გამოუცდია, ქალების 9% სექსუალური ძალადობის მსხვერპლი ბავშვობაში გამხდარა, 5-დან 1 ქალი ამბობს, რომ სექსუალური შევიწროება გამოუცდია.
