საქართველოს სახალხო დამცველი გაეცნო იაკობ გოგებაშვილის სახელობის სასწავლებლის XII კლასის მოსწავლეების ღია წერილს, რომლითაც მოსწავლეები გამოთქვამენ წუხილს საზოგადოების მხრიდან გამოვლენილ აგრესიის გამო, რომელიც სახალხო დამცველის მიერ მათი სკოლის მიმართ გაცემულ ზოგად წინადადებას მოჰყვა.
როგორც ომბუდსმენის მიერ გავრცელებულ განცხადებაშია აღნიშნული, სახალხო დამცველი ვალდებულია უზრუნველყოს ქვეყანაში თანასწორობა და რეაგირება მოახდინოს ნებისმიერ ფაქტზე, რომელიც განზრახ თუ გაუფრთხილებლობით ახალისებს ან შესაძლოა წაახალისოს დისკრიმინაცია.
სახალხო დამცველი სთავაზობს სკოლების ადმინისტრაციებს, მათ შორის, „კიკეთის სკოლას“, რომ ერთობლივი ორგანიზებით ჩატარდეს სკოლის მოსწავლეებისა და პედაგოგებისათვის სემინარი, სადაც სახალხო დამცველი მათთან ერთად შეძლებს თანასწორობისა და ბავშვთა უფლებების შესახებ საუბარს.
"უპირველესად, სახალხო დამცველი აღნიშნავს, რომ სკოლის მიმართ გაცემული წინადადება შეეხებოდა ერთ კონკრეტულ ფაქტს, კერძოდ, 2017-2018 სასწავლო წელს VIII კლასში გადამსვლელი ბიჭებისთვის გამოცხადებულ სასტიპენდიო პროგრამას და წინადადებაში არ არის შეფასებული ზოგადად სკოლაში არსებული თანასწორობის მდგომარეობა. ამასთან, სახალხო დამცველისთვის მნიშვნელოვანია, რომ არ შეილახოს ბავშვების უფლებები და მოუწოდებს ყველას, აღნიშნულ საკითხზე გამოხმაურებისას მხედველობაში მიიღონ მოსწავლეების ინტერესები.
სახალხო დამცველი ვალდებულია უზრუნველყოს ქვეყანაში თანასწორობა და რეაგირება მოახდინოს ნებისმიერ ფაქტზე, რომელიც განზრახ თუ გაუფრთხილებლობით ახალისებს ან შესაძლოა წაახალისოს დისკრიმინაცია. ზოგადი წინადადება პრევენციული ხასიათისაა და ემსახურება მომავალში დისკრიმინაციის ნებისმიერი ფორმით გამოვლენის თავიდან აცილებას. სახალხო დამცველს 70-მდე რეკომენდაცია და ზოგადი წინადადება აქვს გაცემული თანასწორობის საკითხებზე სხვადასხვა ორგანიზაციების, მათ შორის, საგანმანათლებლო დაწესებულების მიმართ.
„კიკეთის სკოლასთან“ დაკავშირებით, სახალხო დამცველმა ზოგადი წინადადების მომზადების გადაწყვეტილება მიიღო, ვინაიდან, მიიჩნია, რომ როდესაც სტიპენდიის ან სხვა ბენეფიტის გადაცემა ადამიანისთვის ხდება მისი სქესის გამო, იმის მიუხედავად, იგი ბიჭია თუ გოგო, ასეთმა მიდგომამ მომავალში შესაძლოა გამოიწვიოს დისკრიმინაცია განათლების მიღებისას, დასაქმებისას ან სხვა რომელიმე სფეროში.
როგორც თქვენთვისაც ცნობილია, ქალები, საუკუნეების განმავლობაში, ადამიანის უფლებებით სრულყოფილად ვერ სარგებლობდნენ. დღესაც გვხვდება შემთხვევები, როდესაც ქალს დასაქმებაზე უარს ეუბნებიან, რადგან დამსაქმებელი, მცდარი სტერეოტოპების გავლენით, მიიჩნევს, რომ ქალი სამუშაოს სათანადოდ ვერ შეასრულებს ანდა რომ მისი ოჯახური მდგომარეობა (მეუღლე, შვილები), სამსახურთან შეუთავსებელია. ამიტომ, ძალიან მნიშვნლოვანია, რომ სწავლის ხელშეწყობა ან პროფესიული განვითარება დაკავშირებული იყოს არა სქესთან, არამედ ადამიანის საგანმანათლებლო თუ პროფესიულ უნარ-ჩვევებთან. იმისათვის, რომ მოსწავლეებმა კარგი განათლება მიიღონ, არ არის აუცილებელი, რომ კლასში გოგონების და ბიჭების მეტ-ნაკლებად თანაბარი რაოდენობა იყოს, მნიშვნელოვანია, რომ მათი წახალისება სხვა, ობიექტურ გარემოებებთან იყოს დაკავშირებული, რადგან კრიტერიუმად სქესის დაწესებამ, მომავალში შესაძლოა, თუნდაც უნებლიედ, დისკრიმინაცია გამოიწვიოს.
სახალხო დამცველი სთავაზობს სკოლების ადმინისტრაციებს, მათ შორის, „კიკეთის სკოლას“, რომ ერთობლივი ორგანიზებით ჩატარდეს სკოლის მოსწავლეებისა და პედაგოგებისათვის სემინარი, სადაც სახალხო დამცველი მათთან ერთად შეძლებს თანასწორობისა და ბავშვთა უფლებების შესახებ საუბარს.
სახალხო დამცველი წარმატებებს უსურვებს ყველა მოსწავლეს სწავლასა და მათ მომავალ საქმიანობაში", - ნათქვამია განცხადებაში.
ცნობისთვის, 1-ელ მარტს იაკობ გოგებაშვილის სახელობის სასწავლებლის მოსწავლეები საზოგადოებას და ომბუდსმენს ღია წერილით მიმართეს.
„ჯი-ეიჩ-ენი“ მოსწავლეების წერილს უცვლელად გთავაზობთ:
"ჩვენ კიკეთის სკოლის XII კლასის მოსწავლეები ვართ.
გვინდა, გამოვეხმაუროთ ბოლოდროინდელ გავრცელებულ ინფორმაციას და გამოვხატოთ ჩვენი პოზიცია ომბუდსმენის მიერ გამოქვეყნებულ დასკვნაზე, რომელსაც მოჰყვა საზოგადოების მხრიდან დიდი აგრესია და შეურაცხყოფა ჩვენი სკოლის ბავშვების, მასწავლებლების, დამფუძნებლის და მშობლების მიმართ.
რაც შეეხება სკოლაში ვითომდა არსებულ უთანასწორობას, სტიპენდია ბიჭებისთვის მხოლოდ ერთ-ერთ კლასში შემადგენლობის დასაბალანსებლად დაინიშნა (10 გოგო და 1 ბიჭი).
ამას გარდა, სკოლაში კიდევ ბევრი სტიპენდიატი გოგო და ბიჭი გვყავს.
ყველა სკოლის მესვეურთა უდიდესი სურვილია, რომ მათდამი დაქვემდებარებული სკოლის მოსწავლეები იყვნენ დაცულნი მრავალი საფრთხისგან, რომლებიც შესაძლოა მათ სკოლაში, ან სკოლიდან გასვლის შემდეგ ემუქრებოდეთ.
ჩვენს სკოლაში ბევრ რამეზეა ნაფიქრი ჩვენი კეთილდღეობისთვის და კომფორტისათვის, დაწყებული მაღალკვალიფიციური პედაგოგებით და დაცვის სამსახურით დამთავრებული.
ჩვენ აქ 9 საათს ვატარებთ - ვსწავლობთ, ერთ ოჯახად ვცხოვრობთ დიდები და პატარები.
გვიყვარს ჩვენი სკოლა - გვაბედნიერებს დილის ვარჯიში და პირველი თოვლი, ოქტომბრის რთველი სიხარულის მომტანია, მოუთმენლად ველოდებით სახელობოს, რომელსაც გემრიელ გაკვეთილს ვეძახით.
ეკოლოგიურ სუფთა გარემოში თავს თავისუფლად და ბედნიერად ვგრძნობთ.
მიუხედავად ამ ყველაფრისა, ჩვენ ასეთი საწყენი პროვოკაციის შედეგად გვიწევს თავის მართლება ზოგიერთებთან იმის თაობაზე, თითქოს ჩვენ სიტყვის და გამოხატვის უფლებები გვეზღუდება.
ჩვენ, კიკეთის სკოლის მოსწავლეები, ვსარგებლობთ მონიჭებული უფლებებით და მოვითხოვთ, სახალხო დამცველმა სიღრმისეულად განიხილოს ყველა უსამართლო ცილისწამება ჩვენი სკოლის მიმართ, ყველა შეურაცხმყოფელი კომენტარი, რომელიც ჩვენზე დაიწერა და დაიცვას ჩვენი, როგორც სკოლის მოსწავლეების უფლება, აღადგინოს წონასწორობა და სამართლიანობა.
ჩვენ ძალიან ადრეულ ასაკში მოგვიხდა შეჯახება ისეთ უსამართლობასთან, როგორიცაა ჩვენი ღირსების შელახვა, პედაგოგების და მშობლების შეურაცხყოფა, რაც ჩვენთვის ძალიან მტკივნეულია.
მოვითხოვთ, ჩვენი შელახული ღირსების და სკოლის ავტორიტეტის რეაბილიტაციას.
მოვითხოვთ საჯარო ბოდიშს ომბუდსმენისგან, რომელმაც სრულიად უსაფუძვლო ინფორმაციაზე და მითქმა-მოთქმაზე დაყრდობით გააკეთა არაკომპეტენტური განცხადება და მოგვევლინა არა დამცველად, არამედ უფლებების დამრღვევად".
