26 თებერვალს და 2 მარტს შორის პერიოდში 27 „ახალგაზრდა ევროპელი ელჩი“ საქართველოდან და ევროკავშირიდან მონაწილეობას მიიღებს ღონისძიებების სერიაში, რომელთა მიზანია ქვეყნის ახალგაზრდობასთან ურთიერთობა ევროკავშირ-საქართველოს პარტნიორობის საკითხებზე.
ღონისძიებები ორგანიზებულია საქართველოში ევროკავშირის წარმომადგენლობასთან ერთად და ისინი მოიცავს წეროვანის დევნილთა დასახლების სკოლაში და თბილისის სახელმწიფო უნივერსიტეტში ვიზიტებს იმ საკითხების განსახილველად, რომლებიც ეხება ახალგაზრდებს, კერძოდ ევროკავშირ-საქართველოს პარტნიორობა და თანამშრომლობა, საერთო ფასეულობები, კულტურა და ის შესაძლებლობები, რომლებსაც ევროკავშირი საქართველოს ახალგაზრდობას სთავაზობს.
ახალგაზრდა ევროპელი ელჩები მაღალი კლასის მოსწავლეებს და უნივერსიტეტის სტუდენტებს გაუზიარებენ საკუთარ გამოცდილებას იმ მიზნით, რომ ისინი უკეთესად გაეცნონ ევროკავშირს, მის ისტორიას, საერთო ფასეულობებს და სტრუქტურებს, ასევე იმ შესაძლებლობებს, რომელსაც ევროკავშირი საქართველოს ახალგაზრდებს სთავაზობს. რადგან ბევრმა ახალგაზრდა ევროპელმა ელჩმა თავად ისარგებლა ევროკავშირის მიერ დაფინანსებული პროგრამებით, ერაზმუს+ და ევროპის მოხალისეთა სამსახურის (EVS) პროგრამების ჩათვლით, სტუდენტებს ექნებათ მათთვის კითხვების დასმის და აზრთა გაცვლა-გამოცვლის უშუალო შესაძლებლობა მეგობრულ და არაოფიციალურ გარემოში ინგლისურ და ქართულ ენებზე. თითოეული პრეზენტაციის შემდეგ ჩატარდება მოკლე ვიქტორინა ევროკავშირის შესახებ, რომლის საშუალებით მოსწავლეები და სტუდენტები საკუთარ ცოდნას შეამოწმებენ.
გარდა ამისა, ახალგაზრდა ევროპელი ელჩები შეხვდებიან ოფიციალურ პირებს შემდეგი ორგანიზაციებიდან: ევროკავშირის წარმომადგენლობა საქართველოში, ევროკომისიის ევროპული სამეზობლო პოლიტიკისა და გაფართოების მოლაპარაკებების გენერალური დირექტორატი და ევროპის საგარეო საქმეთა სამსახური; შეხვედრების მიზანია ინფორმაციის გაცვლა ევროკავშირ-საქართველოს პარტნიორული ურთიერთობის შესახებ და ახალგაზრდების სოციალურად ორიენტირებულ და სამოქალაქო ღონისძიებებში ჩართვის ხელშეწყობა.
„იყო ახალგაზრდა ევროპელი ელჩი საქართველოდან - ეს უდიდესი შესაძლებლობაა“, აღნიშნა ახალგაზრდა ევროპელმა ელჩმა გენო ქუტაშვილმა. „ინფორმაციის გაზიარება ევროკავშირის და მისი შესანიშნავი პროგრამების შესახებ ძალიან მნიშვნელოვანი და სასარგებლოა, განსაკუთრებით წეროვანის დევნილთა დასახლებაში, რადგან ევროკავშირი - ეს არის გზა თავისუფლებისკენ და შანსი განვითარებისთვის“.
საქართველოში მიმდინარე ახალგაზრდული ღონისძიებების შესახებ მოსაზრებების და საუკეთესო პრაქტიკის ურთიერთგაზიარების მიზნით ახალგაზრდა ევროპელი ელჩები ასევე შეხვდებიან ახალგაზრდობის ადგილობრივ პარტნიორებს, მათ შორის ერაზმუს+ ეროვნულ ოფისს, ერაზმუსის სტუდენტთა ქსელს, საქართველოს ახალგაზრდა დიპლომატთა კლუბს, ევროპულ-ქართულ ინსტიტუტს და კავკასიის ახალგაზრდულ კავშირს.
დიალოგით მართულ მსგავს ღონისძიებებში „ახალგაზრდა ევროპელმა ელჩებმა“ მონაწილეობა მიიღეს მოლდოვაში 2016 და 2017 წლის ნოემბერში, სომხეთში 2017 წლის მაისში და აზერბაიჯანში 2017 წლის სექტემბერში, სადაც მათ ჰქონდათ შესაძლებლობა ჩაეტარებინათ ინტერაქტიული სასწავლო სემინარები მაღალი კლასის მოსწავლეების, უნივერსიტეტის სტუდენტებისა და ახალგაზრდული ორგანიზაციებისთვის ევროკავშირისა და აღმოსავლეთ პარტნიორობის ქვეყნებთან მისი ურთიერთობების შესახებ. ეს არის პირველი ღონისძიება დიალოგით მართული მრავალი ამგვარი ღონისძიებიდან, რომლებიც საქართველოში უნდა ჩატარდეს.
„ახალგაზრდა ევროპელი მეზობლების“ ახალგაზრდობის ქსელი გაიხსნა 2016 წლის ივნისში პროექტის „ევროკავშირის აღმოსავლეთ სამეზობლო“ ფარგლებში. ის ორიენტირებულია თანამშრომლობის გაძლიერებაზე 15-25 წლის ახალგაზრდებს და ახალგაზრდულ ორგანიზაციებს შორის ევროკავშირიდან და აღმოსავლეთ სამეზობლოს ქვეყნებიდან. ქსელი წარმოადგენს საკომუნიკაციო პლატფორმას, რომელიც ხელს უწყობს ევროკავშირთან დაკავშირებული იდეების, ინფორმაციის და გამოცდილების ურთიერთგაზიარებას, ასევე ახალგაზრდობის ჩართვას სოციალურ ღონისძიებებში. ორი ღია კონკურსისთვის საფუძველზე ევროკავშირის წევრი სახელმწიფოებიდან და აღმოსავლეთ პარტნიორობის ქვეყნებიდან 200 მეტი ახალგაზრდა იქნა შერჩეული „ახალგაზრდა ევროპელ ელჩად“. განაცხადების მიღება ახალი კონკურსისთვის 2018 წლის ზაფხულში დაიწყება.
