ყოფილი მერის, გიგი უგულავას ადვოკატის, ბექა ბასილაიას განმარტებით, მისი დაცვის ქვეშ მყოფს, თბილისის განვითარების ფონდიდან 48 მილიონი ლარი არ გაუფლანგავს. აღნიშნულის შესახებ მან „ჯი-ეიჩ-ენთან“ საუბარში განაცხადა.
„მას ეს თანხა რომ არ გაუფლანგავს, სასამართლოს გადაწყვეტილებითაც კი დადასტურდა, რომელსაც ჩვენ ვასაჩივრებთ. გაფლანგვის ბრალდება მას მოეხსნა. სასამართლომ განსაკუთრებულად მძიმე დანაშაულიდან მუხლი ნაკლებად მძმე დანაშაულზე, უფლებამოსილების გადამეტებაზე გადააკვალიფიცირა.
მას დანიშნული სასჯელი უკვე მოხდილ სასჯელში ჩაეთვალა. თუმცა, ჩვენ მიგვაჩნია, რომ მის მიმართ გამამტყუნებელი განაჩენი არ უნდა დამდგარიყო. ის გამართლებულად უნდა ეცნოთ“, აცხადებს ბასილაია.
მისი განმარტებით, უგულავას მიმართ პოლიტიკური დევნა მიმდინარეობს.
„გიგი უგულავას მიმართ პოლიტიკურად მოტივირებული საქმეები მიმდინარეობს. ყველამ ვიცით ის უკანონობები, რასაც ხელისუფლება ამ ადამიანის მიმართ წლების მანძილზე სჩადიოდა. ამ ყველაფრიდან გამომდინარე, ჩვენ მიგვაჩნია, რომ ნებისმერ საქმეზე, რომელიც მის მიმართ მიმდინარეობს, გამამართლებელი განაჩენი უნდა დადგეს“, - აცხადებს ადვოკატი.
თბილისის საქალაქო სასამ,ართლომ დღეს გიგი უგულავა წარდგენილ ბრალდებაში დამნაშავედ ცნო. მას 1 წლითა და 3 თვით თავისუფლების აღკვეთა შეეფარდა, თუმცა სააპელაციო სასამართლოს მიერ სხვა სისხლის სამართლის საქმეზე გამოტანილმა განაჩენმა შთანთქა დღეს გამოტანილი განაჩენი და შესაბამისად, დღეს გამოტანილი სასჯელი უგულავას მოხდილად ჩაეთვლება.