მთელი საქართველოს მასშტაბით, 68 ათასი კვადტარული კილომეტრი არსებობს, რათა სიგარეტი სუფთა ჰაერზე მოწიონ, – ამის შესახებ ჯანდაცვის კომიტეტის თავმჯდომარე აკაკი ზოიძემ თამბაქოს მოხმარების შეზღუდვასთან დაკავშირებით განაცხადა.

მისი თქმით, ის მხოლოდ 1000 კვადრატულ კილომეტრზე, ანუ შენობებში ითხოვს შეზღუდვებს, რომ თანამოქალაქეები, შვილებიდა მშობლები არ დაზარალდნენ.

ზოიძემ აქვე განმარტა, რომ ძალაში შედის ნორმა, რომელიც ეხება თამბაქოს კვამლისგან თავისუფალ შენობებს, რომელიც ათასობით ადამიანის სიცოცხლეს გადაარჩენს. მისივე თქმით, ეს პროცესი მთელმა ცივილიზებულმა სამყარომ უკვე გაიარა.

შეგახსენებთ, პირველი მაისიდან სიგარეტის მოწევა იკრძალება:

ნებისმიერი დანიშნულების შენობა-ნაგებობაში, რომელსაც აქვს იატაკი, სახურავი ან ჭერი და არანაკლებ 1/2-ზე აქვს ნებისმიერი სახის ან/და მასალის მოძრავი ან უძრავი კედლები, მათ შორის, ღია ან დახურული ფანჯარა და კარი;

საზოგადოებრივ ტრანსპორტში, ტაქსისა და კატერის გარდა;

საგანმანათლებლო, სააღმზრდელო და საგანმანათლებლო-სააღმზრდელოდაწესებულებების, სხვა სასწავლო დაწესებულებების, ბიბლიოთეკების, მოსწავლე ახალგაზრდობის ბანაკების, ბავშვთა გასართობი ცენტრების და 18 წლამდე ასაკის პირებისთვის განკუთვნილი სხვა დაწესებულებების შენობა-ნაგებობებში და მათ საკუთრებაში არსებულ ტერიტორიებზე, აგრეთვე 18 წლამდე ასაკის პირებისთვის განკუთვნილ საზოგადოებრივ შეკრებებზე;

სამედიცინო და ფარმაცევტული დაწესებულებების შენობა-ნაგებობებში და მათ საკუთრებაში არსებულ ტერიტორიებზე;

ბენზინგასამართ, გაზგასამართ და გაზგამანაწილებელი სადგურებზე, აგრეთვე იმ დაწესებულებათა შენობა-ნაგებობებში და მათ საკუთრებაში არსებულ ტერიტორიებზე, სადაც ცეცხლსაშიში ნივთიერებებია.

ცნობისთვის, თამბაქოს მოხმარებაზე შეზღუდვები 2018 წლის პირველი მაისიდან ამოქმედდება.