შს მინისტრის მოადგილე ნათია მეზვრიშვილის ინფორმაციით, პოლიციის განყოფილებებში და დროებითი მოთავსების იზოლატორებში კამერების განახლების პროცესი მიმდინარეობს, მიმდინარეობს ასევე სამხრე კამერების განახლებაც.
პარლამენტში, ადამიანის უფლებათა კომიტეტის სხდომაზე, სადაც სახალხო დამცველის რეკომენდაციების შესრულების ანგარიშის მოსმენა მიმდინარეობს, მეზვრიშვილმა ასევე აღნიშნა, რომ ეს სახალხო დამცველის რეკომენდაცია იყო.
,,სათვალთვალო კამერები განყოფილებებში დამონტაჟებულია, თუმცა ამჟამად მიმდინარეობს კამერების განახლების პროცესი არა მხოლოდ განყოფილებებში, არამედ დროებითი მოთავსების იზოლატორებში, რადგან კამერების ნაწილი არის მოძველებული. თებერვლის შუა რიცხვებში ჩვენ უკვე გამოვაცხადეთ ამ საკითხებზე ბაზრის კვლევა და მიმდინარეობს შესყიდვის პროცედურები. აღნიშნული ეხება სამხრე კამერებსაც, რაც არის ასევე სახალხო დამცველის რეკომენდაცია. ეს რეკომენდაცია იმავდროულად შეეხება სამხრე ვიდეოკამერების შედეგად გაკეთებული ჩანაწერების შენახვის წესის და ვადის დეტალურ გაწერას. აღნიშნული კამერები გარკვეული დროის ჩაწერას ახორციელებს და ეს არის ერთ-ერთი მიზეზი, რის გამოც მათ განახლების პროცესს ვაწარმოებთ. შესაბამისად, განახლების შემდეგ მოხდება უკვე ჩანაწერის წესისა და ვადის შესაბამისობაში მოყვანაც“, - განაცხადა ნათია მეზვრიშვილმა.
ადამიანის უფლებათა დაცვის კომიტეტის სხდომაზე შს მინისტრისა და მთავარი პროკურორის მოადგილეები იმყოფებიან.
უწყებების წარმომადგენლები საუბრობენ იმ რეკომენდაციების შესრულებაზე, რომელიც მათთვის სახალხო დამცველმა 2016 წელს გასცა.
სახალხო დამცველის განცხადებით, 2016 წელს ძალოვან უწყებებში ადამიანის უფლებების დაცვის კუთხით არსებული პრობლემები კვლავ მოუგვარებელია და კვლავ დღის წესრიგში რჩება.
