სამშენებლო კომპანია „სვეტის“ მენაშენეებმა სადაზღვეო კომპანია „ალდაგის“ სათაო ოფისთან  მათ მიერ შეძენილი მშენებარე ბინების დროულად ჩაბარების ან თანხის დაბრუნების მოთხოვნით საპროტესტო აქცია გამართეს.

ისინი, პასუხისმგებელ მხარედ მიიჩნევენ სვეტის დამზღვევ კომპანია "ალდაგსაც", თუმცა "ალდაგის" იურისტმა დღეს გამართულ შეხვედრაზე მენაშენეებს განუცხადა, რომ "სვეტის" სურვილის შესაბამისად, კომპანიებს შორის თანამშრომლობა შეწყდა.

როგორც აქციაზე შეკრებილებმა „ჯი-ეიჩ-ენს“ განუცხადეს, ისინი სწორედ ალდაგის რეპუტაციას ენდნენ.„გვაკატავებენ დადგინდეს, სად ვეძიოთ სამართალი. ვენდეთ ალდაგს, ,,სვეტი დეველოპმენტს" სრული დაზღვევა ჰქონდა "ალდაგში". ,,ალდაგი" გვეუბნება, რომ დაზღვეული იყო სვეტი და არა მენაშენეები. შემოგვიყვანონ ნორმალური კომპანია და გააგრძელონ მშენებლობა ან დაგვიბრუნონ ჩვენი შვილების ნაწვალები თანხები“, - განგვიცხადა ერთ-ერთმა მენაშენემ, მაყვალა ვათიაშვილმა და დასძინა, რომ აპირებენ სიცოცხლის ფასად იბრძოლონ.

აქციაზე მყოფი კიდევ ერთი მენაშენის თქმით, თუ ამომწურავ პასუხს ვერ მიიღებენ, ,,ალდაგის" ოფისთან აქციას კარვებით გამართავენ.

„სვეტის მენაშენეებს 31 დეკემბერს უნდა ჩაგვბარებოდა ბინის გასაღები. ჯერ მხოლოდ ორი სართულია აშენებული, არადა პატრიარქმა აკურთხა, დაგვაიმედა. გამოაცხადეს, რომ ემიგრანტებზე იყო აქცია - შვიდწლიანი უპროცენტო განვადება და ათპრცენტიანი ფასდაკლება, ჩვენც გავაფორმეთ ხელშეკრულება და შედეგად მივიღეთ, რომ მშენებლობა შეჩერდა. მერიამ შეაჩერა, რადგან უკანონოდ მიიჩნია. ორი თვეა ყველგან ვმართავთ აქციას,

მერიასთან - სადაც გვეუბნებიან რომ ისინი არ არიან პასუხისმგებელი, "სვეტის" ოფისთანაც და აქ - "ალდაგთანაც", პასუხი არავის აქვს. ბოლოს კარვებით მოგვიწევს გაპროტესტება,“- გვითხრა ერთ-ერთმა მენაშენემ. 

აქციის მიმდინარეობის პარალელურად, "ალდაგის" წარმომადგენლები მენაშენეთა ნაწილს შეხვდნენ. შეხვედრაზე გაირკვა, რომ "ალდაგს" და "სვეტს" შორის ხელშეკრულება შეწყდა.

"სვეტი დეველოპმენტმა" სადაზღვეო კომპანია "ალდაგს" წერილობით მიმართა ხელშეკრულების შეწყვეტის თაობაზე, რის შედეგადაც "ალდაგი" წყვეტს ხელშეკრულებას. მანამდე, 24 იანვარს "ალდაგმა" "სვეტს" მიმართა წერილობით, გეგმა-გრაფიკიდან გადაცდენასა და სადაზღვეო პრემიის დავალიანებაზე მიუთითა. ამ ხარვეზის გამოსასწორებლად, 90 დღიანი ვადა მივეცით. რასაც რეაგირება მათი მხრიდან არ მოჰყოლია, 23 თებერვლამდე.​ 23 თებერვალს გვიპასუხეს, რომ მთავრობის ახალი რეგულაციების შესაბამისად, "სვეტს" პროექტების გადაკეთება უწევს, სასამართლოს გზით მერიის დასკვნა მშენებლობის უკანონოობაზე არ გაასაჩივრა, რადგან მაღალი სოციალური პასუხისმგებლობის გამო, დათმობაზე წავიდა“, - განაცხადა მენაშენეებთან შეხვედრაზე კომპანია "ალდაგის" იურისტმა.

„სვეტის“ წერილში, საუბარია, რომ მენაშენეთა ინტერესების დასაცავად, მიმდინარეობს განახლებული პროექტების ატვირთვა მერიის ვებგვერდზე და „სვეტი“ აღნიშნული პროცესის დასასრულებლად გონივრულ  ვადად 45-60 დღეს მიიჩნევს.

შეხვედრის დასრულების შემდეგ "სვეტის" მენაშენე დეა ლაზიშვილმა აღნიშნა, რომ სამართლებრივ დავას აპირებენ.

„ვაპირებთ სამართლებრივ დავას, "ალდაგი" ასე მარტივად ამ საქმიდან ვერ გამოძვრება, თვითონაც ამბობენ, რომ გეგმა-გრაფიკის დარღვევის ფაქტი გაცილებით ადრე იყო დაფიქსირებული, ვიდრე "სვეტს" წერილობით მიმართავდნენ, რადგან "ალდაგი" სადაზღვეო პრემიას იღებდა. მგონია, რომ "ალდაგი" ბოლომდე გახსნილი არ არის და და მთელი რიგი გარემოებები დაფარულია“, - ამბობს დეა ლაზიშვილი.

"სვეტის" ირგვლივ მიმდინარე მოვლენებს შეეხო დედაქალაქის მერის დღევანდელი განცხადებაც, რომელიც განმარტავს, რომ დედაქალაქში „ჰარი-ჰარალე“ და გაურკვეველი საქმიანობები დამთავრდა.

„კომპანია „სვეტს“ სერიოზული დარღვევები აქვს. პირდაპირ შემიძლია გითხრათ, რომ უკანონოდ ახორციელებდნენ მშენებლობას. ჩვენ არავის მივცემთ შესაძლებლობას, რომ დედაქალაქში უკანონო მშენებლობები განახორციელონ. „ჰარი-ჰარალე“ და გაურკვეველი საქმიანობები დამთავრდა , შესაბამისად, კეთილი ინებონ, მწყობრში მოიყვანონ ყველაფერი“, – განაცხადა თბილისის მერმა.

თამთა ქარქაშაძე, ჯი-ეიჩ-ენი