ჯანდაცვის მინისტრ დავით სერგეენკოს განცხადებით, ტყვიის შემცველობის პრობლემასთან მიმართებით, სამწუხაროდ, ვერც ერთი ქვეყანა თავს უსაფრთხოდ ვერ გრძნობს.
როგორც მინისტრმა პარლამენტის ჯანდაცვის კომიტეტის სხდომაზე განმარტა, სურსათის უვნებლობის სამსახურმა ახალი რეგულაცია შემოიღო, რომელიც ტყვიის გავრცელების წყაროს მნიშვნელოვან ზიანს მიაყენებს.
"სამწუხაროდ, აღმოჩნდა, რომ უსაფრთხოდ ვერც ერთი ქვეყანა ვერ გრძნობს თავს, რადგანაც ტყვიას ზოგადად აქვს თვისება, რომ ათწლეულების განმავლობაში იყოს აკუმულირებული ნიადაგში და შეინახოს თავისი დამაზიანებელი თვისება. ამიტომ 2016 წელს, ჯანდაცვის მსოფლიო ორგანიზაციამ ტყვიასთან ბრძოლის საერთაშორისო სტრატეგიის გაწერა დაიწყო.
წელს ტარდება დიდი კვლევა გაერო-ს ბავშვთა დაცვის ფონდთან ერთად და სრული სურათი გვექნება. რაც შეეხება მკურნალობას, ჯანდაცვის მსოფლიო ორგანიზაციას აქვს ასეთი ტაქტიკა, რომ რაღაც დონემდე თუ არის ტყვიის შემცველობა, გადასადგმელი ნაბიჯები არის გარემო პოტენციური ფაქტორების მოცილება. მხოლოდ გარკვეული ზომის მერე არის მედიკამენტოზური მკურნალობა. რამდენადაც მე ვიცი, მსოფლიოში ძალიან ცოტა რაოდენობით ჩატარებულა ის, რადგან ამის საჭიროება რეალურად იშვიათად დგება - უნდა იყოს ძალიან მაღალი კონცენტრაცია“, - განაცხადა სერგეენკომ.
