Hürriyet Daily News-ი საქართველოში თურქი ვიზიტორების შესახებ სტატიას აქვეყნებს.
სტატიაში განხილულია თურქეთის სტატისტიკის ინსტიტუტის (TÜIK) მონაცემები, რომლებშიც ტურიზმის განვითარებასთანაა დაკავშირებული, კერძოდ, საუბარია თურქი ტურისტების ყველაზე პოპულარულ მიმართულებებზე (ავტორი - გიუნეშ კომურჩილერი).
როგორც პუბლიკაციაშია აღნიშნული, 2017 წელს მნიშვნელოვნად შემცირდა თურქეთის იმ მოქალაქეთა რაოდენობა, რომლებიც ამერიკის შეერთებულ შტატებს ეწვივნენ (2016 წელს - 313 654, ხოლო 2017 წელს - 157 896). მიზეზი - თურქეთ-აშშ-ის ურთიერთობის გაუარესება. ასევე შემცირდა კანადაში.
რაც შეეხება თურქი ტურისტების ყველაზე პოპულარულ მიმართულებებს, 2017 წლის განმავლობაში ყველაზე მეტი თურქი ეწვია საქართველოს, საბერძნეთს და ბულგარეთს.
„იმ თურქების რაოდენობა, რომლებიც გასულ წელს საქართველო მოინახულეს, თითქმის 1 მილიონს აღწევს, თუმცა 2016 წელთან შედარებით მაინც 170 ათასით ნაკლებია. საბერძნეთში კი თურქი ტურისტების რაოდენობამ მოიმატა: მეზობელ სახელმწიფოს 921 262 თურქი ეწვია, სადაც მათ დაბალი ფასები და მომსახურების მაღალი დონე იზიდავთ. რაც შეეხება ბულგარეთს, ეს ქვეყანა 807 645-მა თურქმა მოინახულა“, - ნათქვამია სტატიაში.
