პროფკავშირების წინასწარი შეფასებით, ჟვანიას ქუჩაზე მიმდინარე მშენებლობაზე, სადაც 26 წლის მუშა გადავარდა და ადგილზე გარდაიცვალა, უხეშადაა დარღვეული უსაფრთხოების ნორმები.
მათი ინფორმაციით, დაღუპულს არ ჰქონდა დამცავი აღჭურვილობა.
"ტრაგედია ჟვანიას ქუჩაზე, გარდაცვლილი 26 წლის ახალგაზრდა მამაკაცია. ის მშენებარე კორპუსის მეხუთე სართულიდან გადმოვარდა. პროფკავშირების წინასწარი შეფასებით უხეშადაა დარღვეული უსაფრთხოების ნორმები. ახალგაზრდას არ ჰქონდა დამცავი აღჭურვილობა. ცხედარი პროზექტურაში ჯერ არ გადაუსვენებიათ", - ნათქვამია საქართველოს პროფკავშირების გაერთიანების განცხადებაში.
შეგახსენებთ,თბილისში, ნინო ჟვანიას #10-ში მშენებარე კორპუსიდან მუშა გადავარდა, ახალგაზრდა მამაკაცი ადგილზე გარდაიცვალა.
როგორც "ჯი-ეიჩ-ენს" შინაგან საქმეთა სამინისტროში განუცხადეს, გამოძიება სისხლის სამართლის კოდექსის 240-ე მუხლით დაიწყო, რაც გულისხმობს სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას.
