„გადადგით თამამი ნაბიჯი. ნუ დაემორჩილებით ხელისუფალთ და აღიარეთ, რომ მე უდანაშაულო ვარ“ - ამ სიტყვებით მიმართა მსჯავრდებულმა დეკანოზმა გიორგი მამალაძემ თბილისის სააპელაციო სასამართლოს მოსამართლეთა კოლეგიას.
როგორც ადვოკატები განმარტავენ, დეკანოზმა დეტალურად ისაუბრა მისი დაკავების დღიდან დღემდე განვითარებულ მოვლენებზე.
“დეკანოზმა თავის საბოლოო სიტყვაში რამდენიმე მნიშვნელოვან საკითხზე გაამახვილა ყურადღება. მან ისაუბრა იმაზე თუ როგორ მოიტაცეს და თუ როგორ მიდიოდა შეთავაზება რომ დანაშაული ეღიარებინა. მან ისაუბრა კონკრეტულ ფაქტებზე თუ როგორ სთავაზობდნენ არა მხოლოდ პროკურატურის თანამშრომლები, არამედ სხვა პირებიც თანამშრომლობას.“ - განაცხადა დეკანოზ გიორგი მამალაძის ადვოკატმა გიორგი ფანცულაიამ ჟურნალისტებთან საუბრისას.
როგორც ის განმარტავს დეკანოზმა სასამართლოს აუხსნა, რომ მას შორენა თეთრუაშვილის მკვლელობა მისი კარიარული წინსვლისთვის არ სჭირდებოდა, რადგან ის მეუფე დიმიტრის თხოვდა რომ ეპარქიაში დაებრუნებინა.
ადვოკატის განცხადებით, პროკურატურის თანამშრომლები მას სთავაზობდნენ მის თანამზრახველად სოსო ოხანაშვილი და მეუფე დიმიტრი დაესახელებინა.
ფანცულაია დასძენს, რომ დეკანოზთან დაახლოებით ორი თვის წინ რამდენიმე პირი იყო შესული, რომლებმაც დეკანოზს უთხრეს „თუ არ იხმაურებდა და პრობლემებს არ შექმნიდა“ მას გაათავისუფლებდნენ. ადვოკატი აღნიშნავს, რომ ეს პირები პროკურატურის თანამშრომლები არ იყვნენ.
თბილისის სააპელაციო სასამართლოში დასრულდა დეკანოზის საქმის განხილვა. მოსამართლეთა კოლეგია სათათბიროდ გავიდა. თუ როდის გამოაცხადებენ ისინი აღნიშნულ საქმეზე განაჩენს, უცნობია.
შეგახსენებთ რომ დეკანოზ გიორგი მამალაძეს თბილისის საქალაქო სასამართლომ 5 სექტემბერს 9 წლით თავისუფლების აღკვეთა მიუსაჯა.
