მეტროსადგური „ვარკეთილი“ სავარაუდოდ, ხვალ დილის ექვსი საათიდან მგზავრებს ჩვეულ რეჟიმში მოემსახურება.
თბილისის სატრანსპორტო კომპანიის ინფორმაციით, ამ დროისთვის, მეტროსადგურ „ვარკეთილის“ ქვედა ვესტიბიულიდან ნაგავი გააქვთ. ასევე, ჩამოანგრიეს ჭერის ის ნაწილიც, რომელსაც შესაძლოა, მგზავრებისთვის დამატებითი პრობლემები შეექმნა.
როგორც თბილისის სატრანსპორტო კომპანიაში საზოგადოებრივ მაუწყებელს განუცხადეს, სამუშაოები ინტენსიურ რეჟიმში მიმდინარეობს და თუკი დაბრკოლება არ შეიქმნა, სხვა მეტროსადგურებთან ერთად, „ვარკეთილი“ მგზავრებს 06:00 საათზე მიიღებს. დაბრკოლების შემთხვევაში, შესაძლოა, მხოლოდ მეტროსადგურის ამუშავების დრომ გადაიწიოს.
ცნობისთვის, მეტროსადგურ „ვარკეთილის“ ქვედა მოსაცდელში დაკიდული ჭერის კონსტრუქცია ჩამოიშალა და 14 ადამიანი დაშავდა.
