სპორტი გახლავთ არამხოლოდ სასიამოვნო, არამედ სასარგებლოც, რადგან დადებით გავლენას ახდენს ადამიანის ჯანმრთელობაზე. გამონაკლისს არ წარმოადგენს არც ზამთრის სპორტის სახეობები.

სპეციალისტთა აზრით, ზამთრის სპორტის სახეობების მიერ ადამიანის ორგანიზმისთვის მოტანილი სარგებელი სხვადასხვანაირია. მაგალითად:

თხილამურებით სრიალი

სხეულს ამტანობას სძენს და ორგანიზმის საერთო გამოჯანმრთელებას ახდენს.

სპორტის აღნიშნული სახეობა იწვევს:

• გულ -სისხლძარღვთა სისტემის მუშაობის გაუმჯობესებას;
• სასუნთქი ორგანოების მუშაობის გაუმჯობესებას;
• იმუნიტეტის ამაღლებას.

გარდა ამისა, თხილამურები კარგია იმ ადამიანებისთვის, რომლებსაც სურთ ჭარბი წონისგან გათავისუფლება.

1 საათის განმავლობაში თხილამურებით სრიალისას ორგანიზმი წვავს დაახლოებით 500 -600 კალორიას.

სპეციალისტთა აზრით, კვირაში 2-3 -ჯერ, 3 -5 კილომეტრის თხილამურებით გავლა ყოველგვარი დიეტისგან გაგათავისუფლებთ.

სნოუბორდი

ეს გახლავთ სხეულის მოვლის საუკეთესო საშუალება, რადგან სნოუბორდინგის დროს მუშაობს ყველა კუნთი.

გარდა ამისა, მას ნორმალურ მდგომარეობაში მოყავს გულ -სისხლძარღვთა და სასუნთქი სისტემების მუშაობის პროცესი.

ასევე ავსებს სისხლს ჟანგბადით და რაც ყველაზე მთავარია, სნოუბორდინგისას მიღებული მძაფრი შეგრძნებები, მედიკოსებმა აღიარეს ფსიქოლოგიური ჯანმრთელობისთვის ძალიან სასარგებლოდ.

ჯანმრთელობისთვის სარგებლის მოტანის მიზნით, რეკომენდირებულია სნოუბორდზე მინიმუმ ერთი საათით და კვირაში მინიმუმ ერთხელ ან ორჯერ დადგომა.

ყინულზე სრიალი

ყინულზე სრიალისას ადამიანის სხეული იძენს ბალანსირების რეფლექსს.

გარდა ამისა, აღნიშნული სპორტით ინტენსიურად დაკავების შემთხვევაში ხდება ორგანიზმის ტონუსის ამაღლებას და სხვადასხვა ინფექციების წინააღმდეგ ბრძოლის უნარის გამომუშავება.

აუცილებლად აღსანიშნავია, რომ ყინულზე სრიალი ორგანიზმს ჭარბ წონასთან და ცელულიტთან ბრძოლაშიც ეხმარება.

რეკომენდაციები ზამთრის სპორტით დაკავების მსურველებს

სანამ თქვენთვის სასურველი სპორტის სახეობას აირჩევთ, აუცილებელია, რომ გაიაროთ მოსამზადებელი ეტაპი, რომელიც მოიცავს:

• ექიმთან კონსულტაცია, რომლის დროსაც გაარკვევთ არის თუ არა თქვენი ორგანიზმის მხრიდან ზამთრის ამა თუ იმ სპორტზე უკუჩვენების საფრთხე;
• ახალბედებისთვის რეკომენდირებულია სხეულის მომზადება. სპორტით დაკავებამდე გააკეთეთ მარტივი ვარჯიშები, რაც თქვენს კუნთებს შეამზადებს სერიოზული დატვირთვისთვის;
• სწორად შეარჩიეთ სპორტული სამოსი. ის უნდა იყოს თბილი და ხარისხიანი. ნაჭერი სწრაფად უნდა შრებოდეს. აუცილებელია დამცავი აქსესუარებიც, ჩაფხუტი, სამუხლეები და ა.შ.

გარდა ამისა, აუცილებელია გაითვალისწინოთ, რომ:

• არ შეიძლება სპორტული აქტივობის მშიერ კუჭზე დაწყება. ისაუზმეთ ან ისადილეთ ზამთრის სპორტით დაკავებამდე 1 ან 2 საათით ადრე;
• სპორტული აქტივობისთვის, შეარჩიეთ თქვენი შესაძლებლობებისა და ფიზიკური მონაცემების შესაბამისი სირთულის დონე. არ ღირს სიძნელეებთან მოუმზადებლად შეჭიდება.
• სასურველია, რომ თხილამურებით სრიალისა და სნოუბორდინგის დროს არ იყოთ მარტო და თან გახლდეთ კომპანიონი. თუ მარტო სრიალი გიყვართ, მაშინ წინასწარ გააფრთხილეთ ახლობლები თქვენი ადგილმდებარეობის შესახებ, რათა გაუთვალისწინებელმა შემთხვევამ სერიოზული პრობლემა არ შექმნას.