ბეჟანთუბნის სარკინიგზო გვირაბის სამშენებლო მონაკვეთზე მომხდარი აფეთქების შედეგად დაშვებულების მკურნალობის და რეაბილიტაციის ხარჯებს მთლიანად ჩინეთის რკინიგზის 23 ე ბიურო დაფარავს.
როგორც "ჯი-ეიჩ-ენს" პროფკავშირების გაერთიანებაში განუცხადეს, დაშავებულთა სავსებით გამოჯანმრთელებამდე მათ იძულებითი მოცდენისათვის გადაუხდიან ხელფასის სრულ ოდენობას.
"იმ დღეების განაცდური, როდესაც ობიექტზე მუშაობა პარალიზებული იყო მომხდარი აფეთქების გამო, დასაქმებულებს აუნაზღაურდებათ ჩვეული ტარიფით. მომდევნო 10 დღის განმავლობაში, პროფკავშირების შრომის უსაფრთხოების ინსპექტორები ობიექტზე შევლენ და იქ არსებულ მდგომარეობას შეისწავლიან. აღსანიშნავია ისიც, რომ ჩინეთის 23ე ბიუროს წარმომადგენლებმა აიღეს ვალდებულება, უშუალოდ ინსპექტორების მითითებებით გამოასწორონ უსაფრთხოების ნორმები", - აცხადებენ პროფკავშირების გაერთიანებაში.
რკინიგზელთა ახალი პროფკავშირის წარმომადგენლებმა, პროფკავშირს და კომპანიის ხელმძღვანელებს შორის მიღწეული შეთანხმების შესახებ გუშინ, 24 იანვარს აცნობეს,შეხვედრა ხაშურში შედგა.
შეგახსენებთ, 22 იანვარს, ხარაგაულის რაიონის სოფელ ბეჟათუბანში, სარკინიგზო გვირაბის მშენებლობაზე აფეთქება მოხდა.
შედეგად დაშავდა სამი მუშა.
ინციდენტამდე რამდენიმე დღით ადრე მუშები შრომითი უსაფრთხოების ნორმების უხეშ დარღვევას აპროტესტებდნენ, რის შემდეგაც ადგილზე შრომის სამინისტროს ინსპექტირების დეპარტამენტი ჩავიდა.
შინაგან საქმეთა სამინისტროს ინფორმაციით, მომხდარზე გამოძიება საქართველოს სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ადამიანის ჯანმრთელობის დაზიანება გამოიწვია.
მომხდარზე მოკვლევას ეკონომიკის სამინისტროც აწარმოებს.
