სახელმწიფო აუდიტის სამსახურში შეხვედრა გამართა სომხეთის ეროვნული ასამბლეის დელეგაციამ, რომელიც საქართველოში სამუშაო ვიზიტით იმყოფება.
შეხვედრა ორგანიზებული იყო გერმანიის საერთაშორისო თანამშრომლობის საზოგადოების, GIZ-ის რეგიონული პროგრამის „საჯარო ფინანსების მართვა სამხრეთ კავკასიაში“ მიერ. პროგრამის მიზანია საქართველოსა და სომხეთში საბიუჯეტო პროცესის ძირითად მონაწილე ინსტიტუტებს: საკანონმდებლო ორგანოებს, უმაღლეს აუდიტორულ ორგანიზაციებს და ფინანსთა სამინისტროებს შორის გამოცდილების გაზიარება.
გენერალურმა აუდიტორმა ირაკლი მექვაბიშვილმა და სომხეთის ეროვნული ასამბლეის საფინანსო-საკრედიტო და საბიუჯეტო საკითხების კომიტეტის თავმჯდომარემ გაგიკ მინასიანმა საჯარო ფინანსების მართვაში უმაღლესი აუდიტორული ინსტიტუტების როლისა და არსებული გამოწვევების შესახებ ისაუბრეს.
შეხვედრის მონაწილეებმა ასევე მოსაზრებები გაცვალეს უმაღლესი აუდიტორული ორგანოსა და პარლამენტს შორის ეფექტური თანამშრომლობის შესაძლებლობების განვითარებასთან დაკავშირებით.
სომხეთის ეროვნული ასამბლეის დელეგაციის წევრების გარდა, შეხვედრას ესწრებოდნენ გენერალური აუდიტორის მოადგილე ეკა ღაზაძე, გერმანიის საერთაშორისო თანამშრომლობის საზოგადოების (GIZ) პროგრამის PFM-ის მრჩევლები - ინგა სინჯიკაშვილი და ჰოვანეს მარგარიანცი.
