„საქართველო - სამხრეთკავკასიური ქვეყანა - თავისი ისტორიით, არქიტექტურით, ბუნებით, კულტურით, ეროვნული სამზარეულოთი და განვითარებული მეღვინეობით რეგიონის მარგალიტს წარმოადგენს“, - ამის შესახებ სამხრეთ კორეული გაზეთი The Korea Herald-ის ჟურნალისტი ჯოელ ლი სტატიაში, სათაურით, „საქართველო - უსაფრთხო და ტურისტებისთვის მიმზიდველი ქვეყანა“ წერს.
ჟურნალისტი ასევე აღნიშნავს, რომ საქართველო, მოგზაურობის თვალსაზრისით, მსოფლიოს ერთ-ერთ უსაფრთხო ქვეყნად ითვლება, რასაც ამერიკის შეერთებული შტატების სახელმწიფო დეპარტამენტის მიერ გავრცელებული რეკომენდაციაც ადასტურებს.
„საერთაშოირისო მასმედიაში სულ უფრო მზარდი რეკლამირების წყალობით მსოფლიოს სხვადასხვა ქვეყნების ტურისტები საქართველოს სულ უფრო მეტ ყურადღებას აქცევენ და აღიარებენ ქართულ ღირსშესანიშნაობებს, როგორც მნიშვნელოვან ფასეულობებს.
საქართველო ევროპა-აზიის გზაგასაყარზე მდებარეობს და მრავალი საუკუნის განმავლობაში აქვს ურთიერთობა მეზობლებთან - რუსეთთან, თურქეთთან, აზერბაიჯანთან და სომხეთთან. საქართველოს გამოცდილება ტურიზმის სფეროში მრავალფეროვანია: აქ მოგზაურებს სთავაზობენ მიმზიდველ ისტორიულ და რელიგიურ ტურებს, კულტურის დღესასწაულებში მონაწილეობას, ცურვას, სპა-სალონებს და სპელეოლოგიურ ღონისძიებებს. გათვალისწინებულია აგრეთვე ტურები ღვინის მოყვარულებისთვის
საქართველოს საოცარი კლიმატური ზონები და რელიეფი გააჩნია, შავი ზღვის სუბტროპიკული ნაპირით დაწყებული და კავკასიის თოვლიანი მთებით დამთავრებული. ამ ქვეყანაში არის ალპური მდელოებიც, ნახევარუდაბნოებიც, ხეობებიც და დაჭაობებული ადგილებიც. საქართველოში ტურისტებს შესაძლებლობა აქვთ თხილამურებით ისრიალონ, ისეირნონ ველოსიპედით და ცხენებით, იფრინონ პარაპლანებითა და საჰაერო ბურთებით, დაკავდნენ რაფტინგით (წყალჯომარდობით).
თბილისი, საქართველოს დედაქალაქი, ქვეყნის აღმოსავლეთ ნაწილში მდებარეობს. მას 1500-წლოვანი ისტორია აქვს და დამშვენებულია შუა საუკუნეების ციხე-სიმაგრეებით, ქვაფენილიანი მიხვეულ-მოხვეული ქუჩებით, დიდებული ეკლესია-მონასტრებით, საუნებით და აბანოებით. ძველ თბილისში მდებარე აბანოებში ბუნებრივი მინერალური ცხელი წყალი მოდის. როგორც ამბობენ, გოგირდის აბანოები კორეელებისათვის საყვარელ ადგილად იქცა. მათი აზრით, ის ძალიან ჰგავს jjimjilbang-ს, პოპულარულ კორეულ ორთქლის საუნას. გარდა ამისა, კორეელი ტურისტებისთვის შთამბეჭდავია ქართული სამზარეულოს კერძებიც, რომლებიც არამარტო კავკასიაშია განთქმული, არამედ ცენტრალურ აზიაშიც და ევროპაშიც.
2016 წელს საქართველო დაახლოებით 5 ათასმა კორეელმა ტურისტმა მოინახულა. წასვლა უვიზოდ ხორციელდება და იქ ყოფნა ერთი წლის განმავლობაში შეიძლება. კორეელი ტურისტები სიამოვნებით ათვალიერებენ მცხეთას (საქართველოს ძველ დედაქალაქს, თავისი უამრავი დიდებული ეკლესია-მონასტრებით), გორს (იქ იოსებ სტალინი დაიბადა), ყაზბეგს (რომელიც იგივე სახელის მქონე მთაზეა შეფენილი), ბათუმს (შავიზღვისპირა კურორტს) და კახეთს, რომელიც ღვინოებითაა განთქმული.
სხვათა შორის, ქართული პასპორტს მსოფლიოს ქვეყნების პასპორტების ინდექსში 53-ე ადგილი უკავია, რაც იმას ნიშნავს, რომ მის მფლობელს უვიზოდ მოგზაურობა საკმაოდ ბევრ ქვეყანაში შეუძლია: მაგალითად, ევროკავშირის შენგენის ზონის სახელმწიფოებში, რომელიც 26 ქვეყანას მოიცავს. აღსანიშნავია, რომ მიმდინარე წელს მსოფლიო ბანკმა საქართველოს ეკონომიკური ზრდის ადრინდელი 0,2%-იანი პროგნოზი 4,2%-ით შეცვალა, ხოლო 2019 წლისათვის ეკონომიკური ზრდა 4,7%-თ განსაზღვრა. 2020 წელს ეკონომიკური მატება 5%-ს მიაღწევს. „გლობალური ეკონომიკური პერსპექტივის“ მოხსენების თანახმად, საქართველო სამხრეთ კავკასიაში ერთ-ერთი ყველაზე დინამიურად განვითარებული ქვეყანა გახდება“, - ვკითხულობთ სტატიაში.
